Gələn həftə 1-ci liqa start götürəcək. 10 komandanın qatılacağı çempionata maraq indidən böyükdü.

Ötən mövsüm Region Liqasında çıxış edən 4 klubun 1-ci liqaya yüksəlməsi turnirin nüfuzunu bir qədər də artırıb. Yenilər “İrəvan”, “Difai Ağsu”, “Araz” və “Karvan”dı.

2 gün sonra start götürəcək yarış üçün komandalar hazırlığı başa vurub. Artıq indidən 6 klub favorit sayılır. Bunlardan biri də “Karvan”dı. Yevlax təmsilçisi uzun müddətdən sonra qayıtdığı böyük futbolda uğur qazanmaq niyyətindədi. Kənan Kərimovun rəhbərlik etdiyi komanda heyətini Şahin Zəkiyev, Ruslan Voronsov, Elvin İsmayılov, Elnur Mustafazadə, Cavanşir Cavanşirov, Müşfiq Teymurov, Ruslan Süleymanov, İzzət Muştaqov, Zaur Fərzəliyev, Akif Tağıyev, Əli Abdullayev, Əzəmət Ələkbərli, Ceyhun Muxtarlı kimi peşəkar və premyer-liqa təcrübəsi olan futbolçularla gücləndirib. “Ağ-qaralar” əcnəbi futbolçular da transfer edib. Bunlardan biri uzun müddətdi komandanın düşərgəsində olan gürcüstanlı qolkiper Tornike Kvaratsxeliyadı. O, yevlaxlılarla razılığa gəlib. Qolkiperlə birillik müqavilə imzalanıb. Onun transferi yaxın günlərdə ictimaiyyətə açıqlanacaq. Qeyd edək ki, 23 yaşlı Tornikenin son klubu Gürcüstanın 1-ci liqasında mübarizə aparan “Merani” olub.

Yaxın günlərdə klub daha iki futbolçu ilə müqavilə bağlayacaq. Söhbət Kot-d”İvuardan olan Kinqz Nqozi və nigeriyalı Qnapi Anqenor Boskodan gedir. Hər iki futbolçu ilə danışıqlar yekunlaşıb. Baxışdan keçən oyunçuları Kənan Kərimov bəyənib.

“Karvan” peşəkarlaşma yolunda da önəmli işlər görür. Əsas komandanın güclənməsi, hazırlığı öz yerində, klub rəhbərliyi də boş dayanmayıb. Yevlaxlılar infrastrukturla bağlı problemləri yoluna qoymaq üçün ciddi addımlar atıb. Şəhər stadionunun qazonu ideal vəziyyətə gətirilib, paltardəyişmə və yardımçı otaqlar qaydasına salınıb. Ötən həftə yeni tablonun quraşdırıldığı Yevlax stadionunda çəkiliş meydançası da hazırdı. Artıq kameraların yerləşdirilməsi üçün yeni məkan hazırlanıb.

Bundan başqa, Kənan Kərimovun çalışdırdığı komanda üçün yeni baza tikintisinə başlanılıb. Meydançaya artıq yeni toxum da səpilib. Həmçinin bazada süni örtüklü əlavə meydança salınacaq. Hələlik məşqlər “Karvan”ın köhnə bazasında aparılır və komanda orda məskunlaşıb. Bazanın gələn il istifadəyə verilməsi planlaşdırılır. 2024/25 mövsümündə premyer-liqada çıxış etməyi hədəfləyən rəhbərlik bazada aşağı yaş qruplarından ibarət komandalar üçün də şərait yaradacaq. Bunun üçün artıq ciddi addımlar atılıb.

Bütün bu işlərin görülməsinin məqsədi var. Qeyd etdiyimiz kimi, rəhbərlik komandanın gələn mövsüm premyer-liqada çıxış etməsini istəyir. Bu səbəbdən də indidən lisenziya ilə bağlı işlər qaydasına salınır. Bu prosesdə Yevlax şəhər İcra Hakimiyyətinin başçısı Anar Tağıyev yaxından iştirak edir. Şəhər rəhbərinin futbola sevgisi hamıya bəllidi. O, “Karvan”ın əvvəlki əzəmətini geri qaytarmaq istəyir. Bu səbəbdən də klubdan dəstəyini və köməyini əsirgəmir.

Sentyabrın 13-də 1-ci liqanın ilk turunun oyunu məhz Yevlaxda keçiriləcək. “Ağ-qaralar” Aran derbisində “Mingəçevir”lə qarşılaşacaq. Kənan Kərimovun komandası açılış oyununda qələbə qazanaraq həm mövsümə yaxşı başlamaq, həm yevlaxlılar sevindirmək, həm də icra başçısının ümidlərini doğrultmaq niyyətindədi.

Yevlaxda peşəkar futbol klubunun olması, təbii ki, sevindirici məqamdı. Ümid edirik ki, görülən işlər fayda verəcək. “Karvan” 1-ci liqaya həm azarkeşləri, həm də oyunu ilə rəng qatacaq.

İLKİN SULTANLI