Almaniya yığmasında gözlənilən hadisə baş verib. Almaniya Futbol İttifaqı (AFİ) milli komandanın baş məşqçisi Hans-Diter Fliki istefaya göndərib.

“Football-plus.az” xəbər verir ki, AFİ-nin rəsmi saytının məlumatında onun köməkçiləri Markus Sorq və Danni Rolun da vəzifəsindən azad edildiyi bildirilib:

Qeyd edək ki, Flik yığmanı 2021-ci ilin mayından çalışdırırdı. Təşkilatçı ölkənin komandası olduğu üçün AÇ-2024-ün seçmə turnirindən azad olan bundestim onun başçılığı altında keçirdiyi son 5 yoldaşlıq matçından 4-də uduzub. AFİ rəhbərliyinin “səbr kasasını daşıran” nəticə isə Volfsburqda Yaponiyaya 1:4 hesablı məğlubiyyət olub.

Xüsusi qeyd edək ki, Flik Almaniya yığmasının tarixinə istefaya göndərilən ilk mütəxəssis kimi düşüb! Belə ki, ondan əvvəlki baş məşqçilərin heç biri postunu vaxtından əvvəl və ya öz istəyi olmadan tərk etməyiblər. Maraq üçün Flikə qədər bundestimi 10 baş məşqçinin çalışdırdığını da bildirək. Onlar Otto Nerts, Zepp Herberger, Helmut Şön, Yupp Derval, Frants Bekkenbauer, Berti Foqts, Erix Ribbek, Rudi Föller, Yürgen Klinsmann və Yoahim Lövdü.

Baş məşqçinin səlahiyyətləri müvəqqəti Rudi Föllerə həvalə edilib. Komandanı Fransa ilə yoldaşlıq oyununa yığmanın texniki direktoru hazırlaşdıracaq. Ona gənclərdən ibarət yığmanın məşqçiləri Hannes Volf ilə Sandro Vaqner kömək edəcəklər.