“Antalyaspor”un şərəfini qoruyan braziliyalı müdafiəçi Naldo Pereyra srağagün bəd xəbərdən sarsılıb. T

"Football-plus.az" xəbər verir ki, təcrübəli braziliyalı futbolçunun qayınatası, qayınanası və oğlunun yer aldığı maşın qəzaya düşüb.

Hadisə srağagün səhər saatlarında Antalyanın Konyaaltı qəsəbəsində baş verib. Adı açıqlanmayan bir şəxsin idarə etdiyi maşın Naldonun italiyalı qaynatası Valter Tilattinin idarə etdiyi maşına çırpılıb. Bu toqquşmanın təsirindən Tilattinin maşını yanındakı motosikllə də toqquşub. Ətrafdakıların səyi nəticəsində hadisə yerinə dərhal polislər, təcili yardım maşını və yanğınsöndürən maşın gəlib. Əzilmiş maşında sıxışıb qalan Tilattini yalnız yanğınsəndürənlərin köməyi ilə ordan çıxarmaq mümkün olub. Ümumilikdə 5 nəfərin yaralandığı qəzada ən ağır xəsarət alan Naldonun oğlu Davi olub. Xəstəxanaya çatdırılan “sambaçı”nın qaynatası ilə qaynanasının vəziyyəti normal olsa da, oğlunu təcili əməliyyat etmək lazım gəlib. Naldo hadisədən xəbər tutan kimi yaralıların yerləşdirildiyi “Ağdəniz Universitetinin Xəstəxanası”na gəlib. Daha sonra “Antalyaspor”un prezidenti Səbri Güləl və klubun başqa üzvləri də xəstəxanaya yollanıb.

Daha öncə “Bolonya”, “Udineze”, “Xetafe”, “Sportinq”, “Krasnodar” və “Espanyol”un şərəfini qorumuş 35 yaşlı futbolçu 2020-ci ildən “Antalyaspor”dadı. Düzdü, o, ötən yay Türkiyədən ayrılaraq Səudiyyə Ərəbistanı təmsilçisi “Əl-Taavun”a yollanmışdı. Amma ailəsi ilə birlikdə Səudiyyə Ərəbistanına uyğunlaşa bilməyən braziliyalı bu yay yenidən “Antalyaspor”la müqavilə imzaladı.