Karyerasını çempionşip təmsilçisi “Hall Siti”də davam etdirən Ozan Tufan üçün mövsüm yetərincə uğurlu başlayıb. Belə ki, 28 yaşlı futbolçu çempionşipdə ayın oyunçusu nominasiyasına namizəd göstərilib. Qeyd edək ki, təcrübəli yarımmüdafiəçi 2022-ci ildən “pələnglər”in şərəfini qoruyur.

"Football-plus.az" xatırladır ki, o, ötən mövsüm çempionşipdə 42 qarşılaşmada 8 qol vuraraq karyerasının ən məhsuldar dönəmini keçirmişdi. Ozan bu performansını cari “futbol ili”ndə də davam etdirir.

Belə ki, türkiyəli futbolçu avqustda çempionşipdə meydana çıxdığı 4 oyunda 4 dəfə fərqlənməyi bacarıb. Ozan hazırda daha 4 oyunçu ilə birlikdə bombardirlər yarışına başçılıq edir. Ozandan başqa avqustun ən yaxşı oyunçusu seçilməyə namizədlər arasında “İpsviç”dən Sem Morsi, “Norviç”dən Qabriel Sara və “Stok Siti”dən Andre Vidiqal da yer almışdı. Dünən qaliblər açıqlandı. Çempionşipin baş sponsoru “Skay Bet” şirkətinin apardığı sorğunun qalibi “Norviç”li Qabriel Sara oldu. Düzdü, 24 yaşlı braziliyalı yarımmüdafiəçi avqustda keçirdiyi 4 oyunda yalnız 1 qol, 2 məhsuldar ötürmə ilə fərqlənib. Amma o, bu oyunlarda həm də komanda yoldaşları üçün 17 qol fürsəti yaradıb. Turnirin rəsmi saytında bu məqam xüsusi qeyd edilib.

Avqustun ən yaxşı məşqçisi isə “Lester”in italiyalı çalışdırıcısı Entso Mareska seçildi. Məşhur türkiyəli şoumen Acun Ilıcalının sahibi olduğu “Hall Siti”nin 5 turdan sonra 10 xalla 6-cı pillədə qərarlaşdığını bildirək.