Acun Ilıcalı amili üzündən Türkiyədə diqqətlə təqib olunan çempionşip təmsilçisi “Hall Siti”də işlər qaydasına düşmür.

Football-plus.az xəbər verir ki, komanda şənbə günü 23-cü tur çərçivəsində öz meydanında “Sanderlend”lə qarşılaşmada yalnız 1 xalla kifayətləndi (1:1). Baxmayaraq ki, rəqib 59-cu dəqiqədən etibarən azlıqda qalmışdı. “Hall Siti”ni məğlubiyyətdən xilas edən isə Ozan Tufan oldu. 71-ci dəqiqədə meydana çıxan türkiyəli yarımmüdafiəçi 11 dəqiqə sonra fərqlənməklə bu mövsüm çempionşipdə 4-cü qolunu vurdu. Komanda 23 oyuna topladığı 26 xalla 21-ci pillədə qərarlaşıb və düşmə zonasından cəmi 2 xal öndədi. Yeni məşqçi Liam Rosenyorun ümidləri doğrultduğunu söyləmək çətindi. Komanda onun başçılığı altında keçirdiyi 5 oyunun yalnız birində qalib gəlib (3 heç-heçə, 1 məğlubiyyət).

Ozan Tufandan söz düşmüşkən, onun başına gələn qəribə bir hadisə ilə də sizi tanış edək. 27 yaşlı futbolçu təxminən 3 il öncə - 2019-un dekabrın əvvəllərində özünə “Audi R8” markalı yeni maşın almışdı. Ozan bir firma ilə anlaşaraq bu maşını Almaniyadan Türkiyəyə gətizdirmiş və bu, ona təxminən 200 min dollara başa gəlmişdi. 7 il “Fənərbaxça”da top qovmuş məşhur futbolçu bugünlərdə böyük bir şok yaşayıb. O, maşınının son durumunu yoxlatdırmaq üçün “Doğuş Oto” şirkətinə müraciət etmək qərarına gəlib. Amma bu şirkət maşını incələyərkən məlub olub ki, Ozanın “oyuncağı” Türkiyəyə qeyri-qanuni şəkildə gətirilib! Ozan əlində rəsmi sənədlərin olduğunu, maşının Almaniyada alındıqdan sonra qaydalara uyğun şəkildə Türkiyəyə gətirildiyi izah etməyə çalışsa da, şirkətin nümayəndələrini razı sala bilməyib. Nəticədə “Doğuş Otto” polislərə həm maşından, həm də futbolçunun özündən şikayət edib. Məsələ ilə bağlı araşdırmaya başlanılıb. İndi Tufan həm bir müddət maşınsız qalmalı olacaq, həm də bu məsələdə haqlı tərəf olduğunu sübut etmək məcburiyyətində qalacaq.