Serbiya yığmasının basketbol üzrə dünya çempionatına 1/4 finala çıxmasına bazar günü Maniladan alınan xəbər kölgə salıb.

"Football-plus.az" xəbər verir ki, “Saraqosa”nın ağır forvardı Borişa Simaniçin (25 yaş, 211 sm) ilk qrup mərhələsi çərçivəsində Cənubi Sudanla oyunda aldığı zərbəyə görə böyrəyi çıxarılıb. Serbiya mediası basketbolçunun karyerasını davam etdirməsinin sual altına düşdüyünü xəbər verir.

Elliot ilə Mourninqin nümunəsi
Nuni Omoto ilə Borişa Simaniçin səbət altında toqquşması ilk baxışdan adi oyun epizodu kimi görünürdü. Oyunun sonuna iki dəqiqə qalmış serb böyrək nahiyəsindən dirsək zərbəsi aldı. Ardından forvard ağrı içində parketi tərk etdi.

Tezliklə aydın oldu ki, zədə yetərincə ciddidi. Hospitala aparılan Borişa təcili əməliyyat olundu. Nuni Omoto jurnalistlərə belə dedi: “Onun xəstəxanaya düşdüyünü eşitdim. Üzr istəyirəm, çirkin oynamaq istəmirdim. Borişanın tezliklə sağalmasını arzulayıram, hər gün onun üçün dua edirəm. Mən kobud oyunçu deyiləm, heç vaxt kiməsə zədə yetirmək niyyətim olmayıb. Simaniçin sağlıq durumuna görə narahatlıq keçirənlərin hər birindən, eləcə də onun özündən səmimi qəlbdən üzr istəyirəm”.

Belə görünürdü ki, Omotonun duaları boşuna getməyib. Avqustun 31-də Serbiya Basketbol Federasiyasının yaydığı açıqlamada Simaniçin özünü yaxşı hiss etdiyi, böyrəyin və onun bütün funksiyalarının qorunduğu deyilirdi. Borişanın yığmadakı oyundaşları da ona dəstək verirdi. Basketbolçunun oyun forması İtaliya ilə oyunun gedişində ehtiyat oyunçular skamyasında qoyulmuşdu. Komanda yoldaşları və məşqçi korpusu bu yolla Simaniçə dəstəyini ifadə edirdi.

Ancaq 2-ci qrup mərhələsinin sonuncu günündə “Sportal” portalı həkimlərin axır ki Borişanın böyrəyini çıxarmağa qərar verdiyi ilə bağlı xəbər yaydı. Serbiya yığmasının oyunçuları bundan Dominikan Respublikası ilə həlledici oyun ərəfəsində xəbər tutdular və rəqibi darmadağın etdilər. Yeni informasiyalar isə basketbolçunun gələcək karyerasının təhlükə altında olduğunu göstərir.

Simaniçin özü və ya təmsilçiləri hələ ki bu mövzuda hansısa şərh verməyib. Ümid edək ki, heç də hər şey deyildiyi qədər faciəvi deyil. Amma basketbol tarixində oyunçuların belə qorxulu diaqnozlardan sonra da sıraya qayıtmasına dair nümunələr var. Məsələn, “San-Antonio”nun heyətində MBA çempionu olan Şon Elliot doğma qardaşından böyrək köçürüləndən sonra iki mövsüm də oynadı və 33 yaşında karyerasını bitirdi. 2003-cü ildə MBA əfsanəsi Alonzo Mourninq böyrəyin funksiyalarını pozan seqmentar qlomeruloskleroz üzündən karyerasını dayandırmalı oldu. Yalnız qohumu böyrəyini transplantasiya üçün qurban verəndən sonra Alonzo parket üzərinə qayıda bildi. Ulduz basketbolçu əməliyyatın ardından “Mayami”nin heyətində daha dörd mövsüm keçirdi.

Bir neçə il əvvəl ən böyük istedadlardan sayılırdı
Simaniç bir neçə il əvvəl Teo Maledon, Deni Avdiya, Usman Qaruba, Leandro Bolmaro və Rokas Yakubaytislə birgə Avropa basketbolunun əsas istedadlarından sayılırdı. Düzdü, adı çəkilənlərdən fərqli nə Avroliqanın top-klublarında möhkəmlənə, nə də MBA-ya yollana bildi. Hərçənd karyerasına başlayanda çox şey vəd edirdi. O, 2013-cü ildə “Buduçnost”dan “Srvena Zvezda”ya keçdi, iki il sonra isə bu komandanın heyətində “Real”la qarşılaşmada əla debüt etdi (10 xal, 4 ribaund). 2015/16 mövsümündə Borişa gənclər arasında Avroliqanın “8-lər finalı”nın ən dəyərli oyunçusu sayıldı, ancaq əsas komandada möhkəmlənmək şansını çox gec qazandı. 2020/21 mövsümündə, nəhayət, Belqradın əsas klubunun heyətində yer aldı, sadəcə, Avroliqadakı yaxşı statistikaya rəğmən, forvarda yeni müqavilə təklif olunmadı. Belədə Simaniç Mişko Rajnatoviçin “Meqa” klubuna yollandı. Məşhur agent 2004-cü ildə aldığı Belqrad klubuna bütün dünyadan olan gənc istedadları yığaraq avtomatik özünün müştərisinə çevirir. Çoxları “Meqa”da bir-iki mövsüm təcrübə yığandan sonra səviyyəcə yüksək kluba keçir. Borişa da bunu bacardı. 2021/22 mövsümündə Adriatik liqasında keçirdiyi hər oyunda orta hesabla 12,8 xal və 4,3 ribaund toplayandan sonra müntəzəm yığmaya çağrılmağa başladı, ötən ilin yayında isə İspaniyaya yollandı.

“Köhnə qitə”nin ən güclü basketbol çempionatında it-bata düşmədi, “Saraqosa”nın heyətində hər oyunda orta hesabla 20 dəqiqə oynadı (6,9 xal və 3,5 ribaund). Serbiya yığmasının baş məşqçisi Svetislav Peşiç Borişanın adını DÇ-yə hazırlıq üçün genişləndirilmiş heyətə saldı, toplanışdan sonra isə yekun iştirak ərizəsində də saxladı. Amma təəssüf ki, Filippin səfəri forvard üçün xoş sonluqla bitmədi...