Qarşıdan daha bir yığma fasiləsi gəlir.

“Football-plus.az” xəbər verir ki, gələn həftə əsas diqqətlər yığmaların oyunlarına yönələcək. AÇ-2024-ün seçmə mərhələsində yer aldığı D qrupunda 4 oyuna topladığı 9 xalla lider olan qardaş Türkiyə yığması da növbəti oyununu keçirəcək. Özü də Ermənistana qarşı! Bazar ertəsindən etibarən bu oyunun hazırlığına start verəcək “ay-ulduzlular” sentyabrın 8-də Əskişəhərdə ermənilərlə qarşılaşacaq. Oyun Bakı vaxtı ilə saat 22.45-də başlayacaq.

Xatırladaq ki, bu komandaların martın 25-nə təsadüf edən və İrəvanda keçirilən ilk oyununda Türkiyə 2:1 hesabı ilə üstün olmuşdu. Ştefan Kuntsun kollektivinin sentyabrda seçmə mərhələ çərçivəsində Ermənistandan başqa oyunu yoxdu. Bu üzdən komanda yoldaşlıq matçı keçirəcək. Rəqib isə Yaponiya olacaq. Türkiyə sentyabrın 10-da hazırlıq üçün Niderlandın Maastrixt şəhərinə yollanacaq. Yaponiya ilə görüş Belçikada, konkret desək, “Genk”in ev stadionu sayılan “Kristal Arena”da oynanılacaq. Bu matç sentyabrın 12-si, Bakı vaxtı ilə saat 16.20-də başlayacaq.

Bu arada Ştefan Kunts dünən yığmaya dəvət alan oyunçuların siyahısını açıqlayıb. Budəfəki 24 nəfərlik siyahıda üç debütant var. Söhbət “Adana Dəmirspor”un 24 yaşlı vingeri Yusuf Sarı, “Qalatasaray”ın 20 yaşlı sol müdafiəçisi Kazımcan Karataş və bugünlərdə 5 milyon avroya “Hatayspor”dan Fransa təmsilçisi “Renn”ə transfer olunan 21 yaşlı forvard Bertuğ Yıldırımdan gedir. Bundan başqa, dünən “Mançester Yunayted”ə transferi rəsmiləşən Altay Bayındır da heyətdədi. İyundakı qarşılaşmalar üçün o, heyətə çağırılmamışdı. “Fənərbaxça”lı Fərdi Kadıoğlunun isə zədə üzündən yığmadan kənar qaldığını bildirək. Sonda sizi yığmaya dəvət alan oyunçuların tam siyahısı ilə tanış edirik: qapıçılar – Mərt Günok (Beşiktaş), Uğurcan Çakır (Trabzonspor), Altay Bayındır (Mançester Yunayted); müdafiəçilər – Onur Bulut (Beşiktaş), Abdulkadir Bardakcı, Kazımcan Karataş (hər ikisi “Qalatasaray”), Mərt Müldür (Fənərbaxça), Cenk Özkaçar (Valensiya), Zəki Çəlik (Roma), Çağlar Söyüncü (Atletiko), Merih Dəmiral (Əl-Əhli), Ozan Kabak (Hoffenhaym); yarımmüdafiəçilər – Cengiz Ündər, İsmayıl Yüksək, İrfan Can Kahveci (hamısı “Fənərbaxça”), Kərəm Aktürkoğlu (Qalatasaray), Salih Uçan (Beşiktaş), Yusuf Sarı (Adana Dəmirspor), Hakan Çalhanoğlu (İnter), Orkun Kökçü (Benfika), Salih Özcan (Borussiya D); hücumçular – Barış Alpər Yılmaz (Qalatasaray), Umut Nayır (Fənərbaxça), Bertuğ Yıldırım (Renn).