Arturo Vidal internet-strimlərin qəhrəmanıdı.

“Football-plus.az” xəbər verir ki, çilili artıq mərhum qolkiper Robert Enke haqda söylədiyi xoşagəlməz fikirlərə görə diqqəti cəlb edib. Bu dəfə isə oxları “Real”a yönəldib.

Yarımmüdafiəçi belə hesab edir ki, VAR sistemi məhz hakimlərin “Real”ın xeyrinə yol verdiyi səhvlərə görə tətbiq olunur. Arturo konkret oyunları xatırlayıb: “Hakimlər “Real”a Çempionlar Liqasını ardıcıl üç dəfə qazandığı illərdə iki dəfə yardım etdi. Söhbət 2017-ci və 2018-ci illərdə “Bavariya”ya qarşı keçirilən oyunlardan gedir. Hamı həmin oyunlara baxıb. Düşünürəm ki, məhz buna görə VAR tətbiq olundu. Oyuna başqa cür artıq müdaxilə etmək mümkün deyildi”.

Vidalın “kral klubu”nun münhünlilərlə haqqında danışdığı oyunları, həqiqətən də, indiyə qədər də suallar doğurur. 2017-ci ildə keçirilən cavab görüşündə macarıstanlı referi Kaşşai iş başında olmuşdu. Viktor oyunu açıq-açığına uğursuz şəkildə idarə etdi, hər iki komandanın xeyrinə səhvlərə yol verdi. Sadəcə, madridlilərin qayda pozuntuları daha aşkar idi. Vidal özü də həmin qarşılaşmada ziyan çəkdi. Düzdü, çilili yarımmüdafiəçi heç vaxt nəzakətli oyunla seçilməyib, ancaq qaydanı pozmadığı epizodda qırmızı vərəqə almışdı.

Bir il sonra “Bavariya” ilə “Real” yenidən görüşdü. Komandaların 2018-ci ildəki cavab oyununun ən qalmaqallı epizodu Marselonun həndbol bacarığını göstərdiyi an sayılır. Həmin oyunu Cüneyt Çakır idarə edirdi. Qayda pozuntusunun olmadığını düşünən türkiyəli referi penalti nöqtəsini göstərmədi. Marselo isə oyunsonrası müsahibədə belə dedi: “Topun əlimə dəymədiyini desəm, yalançı olaram”.

Tezliklə VAR sistemi tətbiq olundu. “Real” da, “Bavariya” da qulaqcıqların təsir dairəsinə düşdü. Düzdü, Vidal növbəti dəfə çox arzuladığı mükafata həsrət qaldı. 2020-ci ildə o artıq “Barselona”nın futbolçusu kimi münhenlilərlə ÇL-də qarşı-qarşıya gəldi. Həmin oyunun hansı hesabla bitdiyini xatırlatmaq lazım deyil. Maraqlı olan başqa məqamdı. Arturo oyundan əvvəl belə bir ifadə işlətdi: “Bavariya” sabah bundesliqadan olan komandaya yox, “Barselona”ya – dünyanın ən yaxşı komandasına qarşı oynayacaq”.

Arturo, ümumiyyətlə, sərt ifadələr işlətməyin həvəskarıdı. Düzdü, sonradan ona ifadələrini xatırladırlar. Lap yaxında, bu ilin fevralında klub dünya çempionatında “Real”ın “... dağıdacaqlarını” vəd etmişdi, ancaq yenə uduzdu. Yeri gəlmişkən, “kral klubu” çilili futbolçunun ən “sevimli” rəqibidi. Yarımmüdafiəçi karyerası boyunca bütün başqa komandalardan daha çox “Real”a uduzub – “Yuventus”, “Bavariya”, “Barselona” və “İnter”in heyətində ümumilikdə 8 dəfə.