Misli premyer-liqasında 5-ci tura yekun vurulub.
“Football-plus.az” xəbər verir ki, “Səbail” “Qarabağ”ı məğlub edib - 2:1. Matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Fasilədən necə yararlanacaqsız?
- Əfsuslar olsun ki, komanda olaraq bir yerdə istirahət edə bilməyəcəyik. Milli komandalara gedən oyunçular var. Digər futbolçularla üç günlük istirahətdən sonra məşqlərə başlayacağıq.

- Kvabena Ovusunun "Qarabağ"a qayıdacağı iddia edilir. Bu, nə dərəcədə doğrudu?
- Mən də sizin kimi mətbuatdan oxumuşam. Belə bir danışıq olmayıb.

- Bu gün qapıda Şahruddin Məhəmmədəliyevə şans verməyinizin səbəbi nə idi?
- Limit amili də var idi. Belə düşündük.

- Avropa Liqasının qrup oyunlarının təqvimini necə dəyərləndirirsiz?
- Normal. Oyunlara hazırlaşacagıq.

- Avrokuboklara görə aparıcı oyunçular çempionat matçlarında start heyətində meydana çıxmır. Bu, Premyer-liqa oyunlarına necə təsir edir?
- Bəli, hardasa bu, problemdi. Amma biz futbolçularımızı da qorumalıyıq. Leandro Andrade milliyə gedəcək. Marko Yankoviçi ümumiyyətlə meydana buraxmadım. Onların ayın 8-də oyunu var. Çempionata istədiyimiz kimi hazırlaşa bilməmişik. Amma bu, ilk dəfə deyil, neçə illərdi bu rotasiyaları edirik. Ola bilər bu il tam alınmadı. Düzgün qərarlar verməyə çalışacağıq.

- Rəqib hesabda önə keçəndən sonra vaxt aparırdı. Bu, sizin komandada qıcıq yaradırdı?
- Ümumən çox təsir edir. Vaxt keçirmək olar, hakimlərə deyəndə deyirlər ki, vaxtı uzadacağıq. Söhbət burada vaxtı uzatmaqdan getmir. Söhbət tempin aşağı düşməsindən gedir. Oyunu ələ alanda 3-4 dəqiqəlik pauza yaranır. Bu, əlbəttə ki, istənilən komandanın futbolçularında qıcıq yaradır. İstəməzdim ki, temp bu qədər aşağı düşsün. Sanki, məğlub olursansa, ikinci hissəni oynamırsan. Hakimə bildirirdim ki, əvvəlcədən xəbərdarlıq elə ki, sonra bu hallar yaşanmasın. Bu da rəqibin taktiki gedişlərindən biridir. Normal baxmaq lazımdı. Qalib gəlmək üçün hər variantdan istifadə edirdilər. Tempi bu qədər salmasaq, yaxşı olar. Futbol dinamik oyundu.

- Avrokuboklarda oynadığınız dönəmdə çempionatda xal itkiləri yaşayırsız. Qışdan sonra bunları kompensasiya etmək olacaq?
- Qışa kimi kompensasiya etmək lazımdı. Qarşıdakı oyunlarda daha da aktiv olmalıyıq. Gələn ili də hələ bilmək olmaz. Bəlkə qrupda oyunlarımız uğurlu oldu. Gələn il üçün də bizim sıx qrafikimiz ola bilər. Hər bir halda buna öyrənməliyik. Neçə illərdi bu yolu keçmişik. Sadəcə bu il xal itkiləri daha çox oldu. Daima liderlər sırasında olmaq istəyiriksə, hansısa addımlar atmalıyıq.

- Bəhlul və Bədavinin formaya düşməsi nə qədər çəkəcək?
- Bəhlulda hər şey normaldı. Bədavi zədəlidi. Onun komandaya qoşulmasına 15-20 gün var.

- Bəhlul Medina qədər effektli deyil...
- Bəhluldan razıyam. Həm Bəhlul, həm Medina müdafiədə etibarlı oynayır. Məncə bir-birini heç də pis tamamlamırlar.

- 5 tura 2 məğlubiyyət və 1 heç-heçə. Bu, çempionatda sizin üçün faciəyə çevrilə bilər?
- Deməzdim faciə olacaq. Amma nəticəyə təsir edə bilər. Turnir cədvəlinə baxsaq, yığdığımız xallardan razı deyilik. Görünür ki, bu il çempionat tam fərqli olacaq. Böyük çempionatlarda bəzən düşünülməmiş nəticələr olur. Ola bilər ki, bu il ona getsin.

- Nəriman Axundzadənin faydalı iş əmsalının yüksək olması üçün ona nə qədər vaxt lazımdı?
- Müddət olaraq deyə bilmərəm. Məncə, mütəmadi oynamaq lazımdır. Özü də bu haqda düşünməlidi. Oyunçu var daha tez adaptasiya olur, oyunçu var vaxt lazımdı. İnandığım futbolçulardandı. Mən şərait yaradıram, özü də gərək aktiv olsun.

- Sizcə, Avropa Liqasının qrup səddini keçmək mümkündü?
- Biz də çox istəyirik azarkeşlərimizi daha uğurlu nəticələrlə sevindirək. Hər turnirdə maksimum gücümüzdən istifadə etməyə çalışmışıq. Əvvəlki illərdə olduğu kimi bu il də çalışacağıq ki, nəticələrimizi, qoruyub saxlayaq.