“İnanıram ki, bu məğlubiyyət bizim üçün faydalı olacaq”
Misli premyer-liqasında 30-cu tura yekun vurulub.
“Football-plus.az” xəbər verir ki, “Qarabağ” “Sabah”a uduzub - 1:2. Oyundan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:
“İlk olaraq Murad Musayevi, "Sabah"ı təbrik edirəm. Çox vacib qalibiyyət əldə etdilər. Təəssüf ki, standart vəziyyətlərdən çox bəsit qollar buraxdıq. Futbolçulara rəqibin üstün tərəfləri haqda məlumat verilir. Əlbəttə ki, hardasa səhvlər buraxılır. İkinci qol çox tez oldu. Qapıya yaxın olmayan yerdən yerinə yetirilən cərimə zərbələri qolla nəticələndi. Görünür, bu gün "Sabah" qələbəyə daha çox layiq idi. Onlara uğurlar arzulayıram. Öz komandama gələndə, çox etiraz ediləsi düşüncədə deyiləm. Bir ildən çoxdu ki, çempionatda məğlub olmurduq. Nə vaxtsa məğlubiyyətin olacağı gözlənilirdi. İnanıram ki, bu məğlubiyyət bizim üçün faydalı olacaq”.
- Sizcə, nəticə oyuna görə oldu?
- Qalib gəliblərsə, demək onların haqqıdı. Hər iki hissədə yüz faizli qol epizodlarımız oldu. Onlar bu gün qalibiyyətə daha çox layiq idilər.
- Sizə elə gəlmir ki, hücumçularınız son matçlarda qol epizodlarını sağa-sola xərcləyir?
- Futbol elə oyundur ki, hər epizodu qola çevirmək heç də asan deyil. İlk epizodda Musa hər şeyi düzgün etmişdi, sadəcə qapıçı yaxşı oynadı. İkinci epizodda top qapıçının üstünə getdi. Çox da asan top deyildi. Qol vururlar qalib gəlirik, vurmurlar məğlub oluruq.
- Filip Ozobiçin son oyunlarda ehtiyatda qalmasının səbəbi nədi?
- Elə bir səbəb yoxdu. Digər futbolçular neçə vaxtdı oynayırlar, heyət komplektləşib. Onun yerində oynayan Leandro Andrade özünü heç də pis göstərmir. Ozobiç də oynayacaq. Qarşıdakı matçlarda onun da şansı olacaq. Ümumən hazırdı.
- Şahruddin Məhəmmədəliyev zədəsini tam sağaldıb?
- Tam sağalıb. Həkimlərlə məsləhət edəcəyik. Birdən-birə belə oyunlara çıxmaq risk olar. Eyni yerdən ikinci dəfə zədə almışdı. Ona görə daha çox vaxt udmaq istəyirik ki, tam bərpa olunsun. Hər şey yaxşılığa doğru gedir. Artıq komanda ilə tam məşqlərə qoşulub.
Digər xəbərlər
