Belə görünür ki, Aleksandr Usikin xarakterində hansısa problem var.

"Football-plus.az" xəbər verir ki, Tayson Füri ilə birləşdirici döyüşün təşkiliylə bağlı danışıqlarda anlaşa bilməyən ukraynalı növbəti dəfə uğursuzluqla üzləşib.

WBA, IBF və WBO versiyaları üzrə superağır çəkinin çempionu Usik (20-0) “WBA World” kəmərinin sahibi – britaniyalı Daniel Dyubua (19-1) ilə birləşdirici döyüşdə üz-üzə gəlməliydi. Ancaq bu yöndə danışıqlar praktiki cəhətdən dayanıb.

Tərəflərə danışıq üçün ayrılan 30 günlük müddət mayın 2-də başa çatıb. Usiklə Dyubuanın nümayəndələri nə razılaşa biliblər, nə də danışıqlarda hansısa tərəqqi əldə olunub. Belədə mayın 25-də bu döyüşün təşkili ilə bağlı promoter sövdələşməsi baş tutacaq.

Usik ötən il avqustun 20-də Entoni Coşuaya qarşı keçirdiyi son döyüşdə hakim qərarı (116:112, 115:113, 113:115) ilə qalib gəlib. Dyubua isə sonuncu dəfə oktaqona ötən il dekabrın 3-də Londonda çıxıb. O, Kevin Lerenlə döyüşün 3-cü raundunda texniki nokautla qələbəni bayram edib.