Çempionlar Liqasının qrup mərhələsinə vəsiqə qazanan və heyətini Serxio Ramos başda olmaqla daha bir neçə ulduzla gücləndirmək istəyən “Qalatasaray”da legioner limiti doludu.

“Football-plus.az” xəbər verir ki, bu üzdən bəzi əcnəbilərlə yavaş-yavaş yollar ayrılır. Artıq bir futbolçunun klubu tərk edəcəyi, demək olar, dəqiqləşib. Söhbət Fredrik Midtşödən gedir. “Molde” ilə səfər oyununda sonradan meydana çıxaraq qələbə qolunu vurmasına baxmayaraq, norveçli yarımmüdafiəçi klubdan ayrılmaq üzrədi. 30 yaşlı futbolçuya İspaniya və İtaliya klubları, eləcə də “İstanbul BŞ”, “Samsunspor” və “Pendikspor” maraq göstərirdi. Midtşö Türkiyədə qalmaq istədiyi üçün onun meneceri superliqa klubları ilə danışıq aparır. “İstanbul BŞ” ilə “Samsunspor” “Qalatasaray”a təzminat ödəmək istəmir. “Pendikspor” isə İstanbul nəhənginə 2 milyon avroya yaxın məbləğ təklif edib. Bu üzdən Midtşö böyük ehtimalla karyerasını məhz bu klubda davam etdirəcək. Təcrübəli oyunçu “Molde” ilə cavab oyununda meydana çıxmadı. Okan Buruk bunu Midtşönun ağrılarının olması ilə izah etsə də, aydın məsəlid ki, əsas səbəb başqa kluba transferinin gündəmdə olmasıdı. “Qalatasaray” bu oyunçunu ötən yay “Alkmaar”dan 3,5 milyon avroya transfer etmişdi. Ötən mövsüm çempionluq yolunda “Adana Dəmirspor”la ev oyununun son anlarında çox vacib qələbə qolunu vurması ilə yaddaşlarda iz buraxan Midştö “Qalatasaray” karyerasını 28 rəsmi oyun, 2 qol, 2 məhsuldar ötürmə göstəriciləri ilə tamamlamış oldu.

Maraqlıdı ki, “Molde” ilə səfər oyununda qol vuran daha bir futbolçu – Serxio Oliveyra da İstanbul nəhəngini tərk etmək üzrədi. Təcrübəli portuqaliyalı yarımmüdafiəçiyə Səudiyyə Ərbistanından və İtaliyadan təkliflər var. Oliveyra da eynilə Midtşö kimi “Molde” ilə cavab oyununda iştirak etmədi. Oliveyranın “sarı-qırmızılar”la 2026-ya qədər müqaviləsi var. Bu futbolçu indiyə qədər 41 rəsmi oyunda 5 qol, 6 məhsuldar ötürməlik performans sərgiləyib. Bu arada Dris Mertensin də “Cim-Bom”u tərk etmək ehtimalı qüvvədədi. Belçikalı ulduz ötən yay Səudiyyə Ərəbistanından illik 10 milyon avroluq astronomik maaş təklifi almışdı. Amma Mertensin həyat yoldaşı İstanbulu tərk etmək istəmədiyindən bu transfer baş tutmamışdı. Ərəblərin həmin təklifi hələ də qüvvədədi. “Qalatasaray” bu satışdan ciddi gəlir əldə edə biləcəyini düşündüyü üçün Mertenslə vidalaşmağa hazırdı. Bundan başqa, “Napoli”nin də Lukas Torreyraya marağı davam edir. Sonda onu da bildirək ki, Türkiyə çempionu bu yay 10 milyon lirə qarşılığında “Ankaraspor”dan transfer etdiyi və 5 illik müqavilə imzaladığı 21 yaşlı yarımmüdafiəçi Siraçhan Nası 1-ci liqa təmsilçisi “Ümraniyəspor”a birilliyə icarəyə verib.