"Təbii ki, hər bir azarkeş məğlubiyyətə pis olur. Lakin biz komandanı yaxşı günündə sevməmişik ki, pis günündə də tərk edək. Biz "Sabah"ı dəstəkləyəndə komanda liqanın sonuncusu idi. Yəni birlikdə dibi də görmüşük, zirvəni də. Biz həmişə oyunçularımıza və Murad Musayevə güvənmişik. İnşallah, bu uğursuz seriya Tovuz təmsilçisiylə oyunda başa çatacaq. Ayaz Quliyevin transferinə gəlincə, bizim üçün formanın arxasında yazılan adın fərqi yoxdu. O forma üçün sona qədər oynasın və canını qoysun, bəsimizdi".

"Əvvəla, komandanın hər hansı uğursuzluq yaşadığını düşünmürük. “Sabah” ilk dəfə çıxış etdiyi avrokuboklarda 4 oyunun üçündə qalib gəldi. Bu da bildiyim qədər avrokuboklarda ilk dəfə çıxış etmiş Azərbaycan klubları arasında ən yaxşı nəticədi. Avrokuboklarda mübarizəni də lotereya sayılan penalti seriyasında dayandırdıq. Çempionata “Qəbələ” üzərində 5:0-lıq qələbə ilə başladıq. Ardınca da son mövsümün bürünc medalçısı “Neftçi” ilə heç-heçə edib, hazırda lider olan “Zirə”yə uduzduq. Özü də 2-ci oyunun 20-25 dəqiqəsini azlıqda keçirdik. Mövsüm hələ yeni başlayıb. Nəzərə alaq ki, komandamızın hesabında təxirə salınmış bir oyun da var. Ən əsası, komanda öz oyun sisteminə sadiq qalıb. Hətta məğlub olduğumuz oyunlarda da rəqiblərdən yaxşı təsir bağışlamışıq. Hansı uğursuzluğu nəzərdə tutduğunuzu bilmirəm. Ayaz Quliyev yetərincə yaxşı karyeraya malik futbolçudu. Azərbaycanlıdı, gələcəkdə millimizdə də çıxış edə bilər. Düşünürəm ki, onun transferi komandamızın gücünə güc qatacaq”.