“Barselona” rəhbərliyi son günlər daha iki əməliyyatı həyata keçirib. Yarımmüdafiəçi Fermin Lopeslə müqavilə yenilənib.

İspaniya mətbuatının xəbərinə görə, 20 yaşlı futbolçu ilə yeni anlaşmanın müddəti 2027-ci il iyunun 30-na qədərdi. Müqavilədə təzminatla bağlı 400 milyon avro məbləği də göstərilib. İspan futbolçu ötən mövsümü icarə əsasında “Linares”də çşxış edib. Bu mövsümə hazırlıq prosesini isə “Barselona”nın əsas komandası ilə keçirib. Ferminin “Real”la yoxlama oyununda (3:0) qol və məhsuldar ötürmənin müəllifi olduğunu da xatırladaq.

Klubun reallaşdırdığı ikinci əməliyyat Markos Alonso ilə bağlıdı. Rəhbərlik onu La Liqada qeydiyyatdan keçirə bilib. Artıq müdafiəçinin adı İspaniyanın yüksək liqasının saytında “Barselona”nın heyətində göstərilib. Beləliklə, onun müddəti 2024-cü ilə qədər nəzərdə tutulan yeni müqaviləsi rəsmən qeydə alınıb. Alonso bu formallıq aradan qaldırıldığı üçün “Barselona”ya La Liqanın 3-cü turunun “Vilyarreal”la matçında kömək edə bilib.

Amma Kataloniya klubu qapıçı İnyaki Penya ilə müdafiəçi İnyiqo Martinesi hələ ki qeydiyyatdan keçirmə bilməyib. Üstəlik “Barselona”nın siyahısında hələ də gənclərdən ibarət komandanın oyunçusu kimi göstərilən Aleks Baldenin yeni müqaviləsi rəsmən qeydə alınmayıb.