"Şəhriyarla birgə "Səbail"də çıxış edəndə onda ölümcül xəstəliyin əlamətləri başlamışdı. Buna rəğmən, xəstəliyə təslim olmadı, müalicəyə başladı. Amma çox heyif, Şəhriyar xəstəliyə qalib gələ bilmədi. Şəhriyarın haqqında istər sağlığında, istərsə də vəfatından sonra ancaq xoş sözlər deyilir. O, hamının yaddaşında yaxşı insan, futbolçu, savadlı, dünyagörüşlü biri kimi qaldı. Allah deyir: "hər can ölümü dadacaq". Bizlər də vaxtı çatanda vəfat edəcəyik. Şəhriyarın vaxtsız ölümünə üzülürük. Allah onun günahlarını bağışlasın, cənnətlə mükafatlandırsın. Qardaşımıza Allahdan rəhmət, ailəsinə səbr diləyirəm".

"Azərbaycan futbol camiəsi üçün olduqca üzücü hadisə baş verdi. Şəhriyar çox gözəl insan, yaxşı futbolçu, savadlı sima idi. O, milli komanda səviyyəsinə qədər irəliləyib ölkənin əsas komandasının da formasını geyib. PFL ailəsi olaraq, Şəhriyarın gənc yaşında vəfatına üzülürük. Ölkə futbolu dəyərli insanını itirdi. Allahdan Şəhriyara rəhmət, ailəsinə isə səbr diləyirik".