''Qalatasaray'' öz gənc istedadlarını bir-bir əldən verməkdə davam edir.

Bu yay artıq komandanı öz yetirməsi olan iki futbolçu tərk edib. Bunlardan biri Bartuğ Elmazdı. 10 yaşından ''Cim-Bom''un akademiyasında top qovan bu istedadlı futbolçu hələ ötən yaydan klubla yeni müqavilə imzalamayacağını demişdi. Nəticədə 2003-cü il təvəllüdlü yarımmüdafiəçi geridə qoyduğumuz mövsüm U-19 komandasında cəmi 8 oyuna çıxdı və 2-ci dövrədə ümumiyyətlə şans qazanmadı. Müqavilə müddəti bu yay başa çatan Bartuğ azad agent statusunda ''Marsel''ə transfer olunub. Amma bu klubdan verilən açıqlamada qeyd olunub ki, Elmaz qarşıdakı mövsümü Fransanın 3-cü liqasında, yəni 5-ci divizionunda çıxış edən ''Marsel''in ikinci komandasında keçirəcək. ''Qalatasaray''ın əldən verdiyi digər istedad isə Emir Tintişdi.

Müqaviləsi yenilənməyən 18 yaşlı futbolçu Andrea Pirlonun çalışdırdığı ''Fatih Karagümrük''ə keçib. Türkiyə mətbuatının yazdığına inansaq, italiyalı mütəxəssis bu futbolçuya şans verməyi planlaşdırır. Emir Tintiş də Bartuğ Elmaz kimi ''Qalatasaray''ın U-19 komandasının üzvü idi. Son mövsümü öz yaş qrupunda çempion kimi tamamlayan bu komandada Tintiş 8 qol, 5 məhsuldar ötürmə ilə diqqət çəkmişdi. ''Qalatasaray'' rəhbərliyi çempion olmuş komandanın 5 üzvü ilə peşəkar müqavilə imzalasa da, Tintiş ilə anlaşmaq mümkün olmadı. Rəhbərlik hər şeydə gənc oyunçunun menecerini günahlandırır. İstanbul nəhəngində bu cür ayrılıqlar 2020-ci ildən bəri davam edir. O vaxt ''altyapı''da yetişən Mustafa Kapı da ilk peşəkar müqavilənin detallarında razılıq əldə edə bilməyincə ayrılmışdı.

Ötən yay ''Qalatasaray'' Morutsan və Çikıldau kimi əcnəbilərə milyonlar xərcləmiş və öz istedadlı yetirməsi Yunus Akgünü ''Adana Dəmirspor''a icarəyə vermişdi. Rumınlar ümidləri doğrultmadığı halda Yunus Adana klubunda öz performansı ilə ön plana çıxmış və 8 qol, 9 ötürmə ilə mövsümün diqqət çəkən oyunçularından olmuşdu. 21 yaşlı solaxay vinger Avrupa klublarının hədəfindədi. Yunus bu yay başqa kluba satılmasa onun yeni mövsümdə ''Qalatasaray''da sərgiləyəcəyi performans indidən səbirsizliklə gözlənilir.