Braziliya yığmasının qarşıdakı oyunları üçün heyəti açıqlanıb. Yeni baş məşqçi Fernando Diniz milli komandada sentyabrda debüt edəcək.

“Football-plus.az” xəbər verir ki, hazırda həm də “Fluminense”ni çalışdıran 49 yaşlı mütəxəssis yığmaya iyulda təyinat almışdı. Braziliya millisi onun rəhbərliyi altında ilk rəsmi oyunlarını DÇ-2026-nın seçmə turnirində keçirəcək. Beşqat dünya çempionu sentyabrın 9-da Boliviyanı qəbul edəcək, ayın 13-də isə Perunun qonağı olacaq. Dinizin bu oyunlar üçün açıqladığı siyahıda Neymarın da adı var. Bilindiyi kimi, o, bir neçə gün əvvəl PSJ-ni “Əl-Hilal”a dəyişib. Səudiyyə Ərəbistanı klubunu çalışdıran Jorje Jezus Neymarın yeni komandasındakı debütünün o, zədəli olduğu üçün bir qədər gecikəcəyini bildirib. Buna baxmayaraq, Diniz vacib matçlarda 31 yaşlı hücumçunun meydana çıxacağına ümid edir.