Karlo Ançelottinin “Real”da qalacağını rəsmən bəyan etməsi Braziliya Futbol Konfederasiyasının (BFK) seçim imkanlarını daraldıb. Artıq milli komandanın baş məşqçi vəzifəsinə əsasən iki mütəxəssisin namizədliyi nəzərdən keçirilir.

“Football-plus.az” xəbər verir ki, yerli mənbələr Braziliya yığmasına Abel Ferreyra ilə Fernando Dinizin təyinat almaq şansını yüksək dəyərləndirir. 44 yaşlı portuqaliyalı Ferreyra son illər “Palmeyras”da, 49 yaşlı braziliyalı Diniz isə “Fluminense”dəki uğurlu fəaliyyəti ilə seçilib. Bu məşqçilərin sırasına alternativ variant kimi “Fənərbaxça”nı çalışdıran 68 yaşlı portuqaliyalı Jorje Jezuşun qoşula biləcəyi də ehtimal edilir.

Xatırladaq ki, Braziliya yığmasında baş məşqçi problemi Titenin DÇ-2022-nin 1/4 finalında Xorvatiyaya penalti seriyasındakı məğlubiyyətindən sonra istefaya yollanması ilə ortaya çıxıb. Komandaya müvəqqəti 50 yaşlı Ramon Menezeş başçılıq edir.