Hər iki komandaya xal hava-su qədər lazım idi.

Meydan sahibləri qələbə qazanmaq, heç olmasa, uduzmamaq üçün mübarizə aparacaqdı. Çünki “Səbail” turnir cədvəlinin zirzəmisindədi, bu matçda da məğlub olsaydı, işi bir qədər də çətinə düşəcəkdi. "Qəbələ" isə ötən tur "Sumqayıt"ı məğlub etmiş, "Zirə"nin də "Qarabağ"a uduzması sayəsində 4-cü yerə yaxınlaşmışdı.

Qonaqlar oyuna daha fəal başladı. Artıq 30-cu saniyədə Felipenin cinahdan asmasını qəbul edən Maçado aşırma zərbə vursa da, top hədəfə düşmədi. "Qırmızı-qaralar"ın heyətində hücumların təşkilində Asif Məmmədov, Felipe Santos, Ramon Maçado və Emil Səfərov fəallığı ilə seçilirdi. Utziq isə həm mərkəzdə rəqibin hücumların qarşısının alınması, həm də komandasının irəlidə çoxalması yolunda dəridən-qabıqdan çıxırdı. İlk 15 dəqiqə qonaqların üstünlüyü şəraitində keçsə də, ardından “dənizçilər” top saxlamağa çalışdılar.

Bunun nəticəsiydi ki, Lyuyiç reyd etdikdən sonra Səlahət Ağayevə təhlükə yaşatdı. Lakin top qapıdan yan keçdi. Bölgə təmsilçisi buna mövqe hücumuyla cavab verdi. Topu qəbul edən Qırtımov cinahla irəlilədikdən sonra qapı önündə müdafiəçilərin gözündən yayınan Maçadoya ötürmə verdi. Braziliyalının Balayevlə dueli zamanı De Fransa da topa toxunmaqla hesabın açılmasına səbəbkar oldu. Qoldan sonra ruhlanan qonaqlar hücumlarını davam etdirdi. Səfərovun zərbəsi qapının üstündən keçdi. Tədricən toparlanan "dənizçilər" təşəbüsü ələ almağa çalışdılar. Stasyukun zərbəsini qapıçı çətinliklə dəf etdi. İlk yarıda "Səbail"in heyətində İlkin Qırtımov zəif oyunla yadda qaldı.
“Dənizçilər”in 2-ci hissəyə fəal başlaması gözlənilən idi. Təsadüfi deyil ki, hissənin əvvəlində hesab bərabərləşdi. Düzdü, bərabərlik qolunda Mirabdullanın zərbəsiylə yanaşı, yaxın küncdən qol buraxan Səlahətin səhvini də qeyd etmək lazımdı.

Cəmi 4 dəqiqə sonra “Qəbələ” daha çətin duruma düşdü. Cərimə meydançasının həndəvərində Stasyukdan ötürmə alan Lyuyiç bir qədər sola meyillənəndən sonra “9-luğ”a gözlənilməz və dəqiq zərbə vurdu. Bir neçə saat əvvəl başa çatan oyunda “Zirə”nin qələbə qazanmasından xəbərdar olan “Qəbələ”nin, heç olmasa, 1 xalı xilas etmək üçün irəli atılmaqdan başqa çarəsi yox idi. 70-ci dəqiqədə Felipe Santosun növbəti cinah reydindən sonra nəzarətsiz qalan Maçado hesabı bərabərləşdirdi. Sonda hər iki tərəfin fərqlənmək şansı olsa da, bu maraqlı oyunda 2:2 hesabı dəyişmədi. Beləliklə, “Zirə” ilə “Qəbələ” arasındakı xal fərqi yenidən 3-ə çatdı.

Gözdən qaçmadı

* Hakimin start fitiniə bir neçə dəqiqə qalmış Mazurek zədələndiyindən onu Mirabdulla Abbasovla əvəz etmək lazım gəldi.
* 20-ci dəqiqədə "qırmızı-qaralar" hesabı açandan sonra stadionun diktoru qolu Maçadonun vurduğunu elan etdi. Elə komanda yoldaşları da braziliyalını qucaqlayıb təbrik etdilər. Lakin protokolda qol De Fransanın ayağına yazılıb, yəni avtoqoldu.
* Oyundan sonra "Səbail" azarkeşləri Emil Balayevi səsləməklə onun çıxışından razı qaldıqlarını bildirdilər. Qolkiper də tribunadakı seyrçilərə yaxınlaşıb, minnətdarlıq etdi.

ABDULLA İSMAYILOĞLU