Misli premyer-liqasında 3-cü turun matçları keçirilir.

"Football-plus.az" xəbər verir ki, "Qarabağ" "Araz-Naxçıvan"ı qəbul edib - 2:1. Matçdan sonra meydan sahiblərinin çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Andrey Lunyovdan gözləntiləriniz nədi? Şahruddin Məhəmmədəliyevin əsas heyətdəki yerini proqnozlaşdırmaq olar?
- Lunyovla xeyli vaxt idi ki, danışıqlar gedirdi. Sadəcə son 7-8 ayda oyun təcrübəsi çatmır. Dünən ilk məşqimiz oldu. Hazırlığı tam yaxşı səviyyədə deyil. Kimin əsas qapıçı olması özlərindən asılı olacaq. Ona ümidlərimiz böyükdü. Karyerası haqda açıqlama verməyə ehtiyac yoxdu. Yaxşı klublarda, yaxşı liqalarda oynayıb. Qarşıdakı günlərdə hər şey bəlli olacaq. Onu əvvəldən istəyirdik.

- "Qarabağ" bu gün çox güc sərf etməli oldu. Bu matç "Olimpiya" ilə oyunqabağı səmərəli hazırlıq oldu?
- Faydası olacaq. Sona kimi mübarizə aparmaq, sona qədər açıq oynamaq, sonda qol vurmaq oyunçulara inam verir. Təki faydası çox olsun. Hər bir halda, iki gün əvvəl qayıtmışıq Bakıya. Beş saatdan çox havada olmuşuq. Oyundan sonra istirahət etmək heç də asan deyil. Bu gün də 6-da oyun oldu. Üç sutka keçməyib HİK-lə matçdan. Bizim borcumuzdu oynamaq. Çalışırıq ki, işimizə məsuliyyətlə yanaşaq. Rotasiyaları, əlimizdəki heyəti gördüz. Kevin Medinanın ağrıları var idi, risk etmədik. Bədavi Hüseynovun da ağrıları oldu. Bu hallar mənə də, komandaya da böyük təcrübə verir.

- "Olimpiya"nı araşdırmısız? İlk matçın səfərdə olması üstünlükdü?
- Ola bilər. Bəzən ilk oyun evdə olur, fayda verir. Futbol elə nöqtəyə gəlib ki, səfər və ev fərq etmir. İnşallah faydalı olar.

- Beş il əvvəl "Olimpiya" ilə oynamısız...
- Onda heç də asan olmamışdı. İndiki "Olimpiya" tam fərqlidi. Sxem dəyişib, fərqli futbola üstünlük verirlər. Baş məşqçiləri də portuqaldı, xeyli sayda legioner Portuqaliyadandı. Portuqal və ispan futboluna dah yaxın sistemdə oynayırlar. Əvvəlki ilə indikinin çox fərqi var. İnanıram ki, iki oyun da maraqlı olacaq.

- Bəhlul həmin oyuna qədər hazır olacaq?
- Olmalıdı. Bu gün ağrıları azalmışdı. Sabahkı məşqdə görək özünü necə hiss edəcək. Ondan sonra məlumat verəcəyik.

- "Sabah" və "Neftçi" avrokuboklarda mübarizəni dayandırdı, yoluna davam edən tək komanda sizsiz. Əlavə məsuliyyət var?
- Bizdə məsuliyyətin olmadığı vaxt yoxdu. "Qarabağ"ın elə adı var ki, burda mütləq məsuliyyət olmalıdı. Bunu rəhbərlik də bizə bildirir, məndə və futbolçularda məsuliyyət çoxdu. İldən-ilə bizdən gözləntilər çoxalır. Amma ümumən "Sabah" və "Neftçi" uduzsa da, layiqli oyun göstərdilər. Oyunlarına baxdım. "Neftçi"yə daha ciddi rəqib düşdü. "Partizan"ın illərdi təcrübəsi var. İkinci hissəyə tam baxdım. Uduzsalar da, yaxşı oynadılar. Bu amil ola bilər ki, bizim məsuliyyətimizi daha da artırsın. Stimul həmişə var. Hamı "Qarabağ"lı olacaq. Biz də çalışacağıq ki, maksimum güc sərf edək ki, onları sevindirək.

- Mətbuatda daha bir transferin olacağı iddia olunur. Bu haqda nə deyə bilərsiniz?
- Ola bilər ki, transfer olsun. Çünki transfer pəncərəsinin bağlanmasına bir neçə gün var. Düşündüyümüz mövqeyə oyunçu tapsaq, edəcəyik.

- Lunyovun hazırkı durumuna əsasən demək olarki, ondan qrup mərhələsində faydalanacaqsız...
- Bir neçə gün vaxtımız var. Oyunqabağı məşqimiz oldu. Sabah və birigün məşqimiz olacaq. Məşqlərdə baxacağıq. Oyun təcrübəsi son vaxtlar olmasa da, təcrübəsi ona kömək edə bilər. Hazırlığı mənim üçün vacib olacaq. Qapıçı məşqçiləri ilə danışacağıq. Get-gedə qarşıdakı oyunlarda öz idman formasını geri qaytarsa, istifadə edəcəyik.

- Mateus Barbosanın Bakıda olduğu deyilir...
- Düşündüyümüz transferlərdən Bakıda olanları yoxdu.

- Qaspar Panadero komandada qalacaq?
- Ayrılmaq qərarına gəlmişik. Əvəzedici komandadı. Sadəcə komanda tapdıqda, buraxa bilərik. Yoxdusa, onun hüquqları var. Sona qədər məcburuq ki, müqaviləsinə əməl edək. Amma özünə bildirilib ki, komanda tapsa buraxacağıq.

- Legioner futbolçu transfer ediləndə, rüsum ödənilir. Milli üzvlərinə görə rüsum lazım deyil. Sizdə isə 15 legioner var ki, onlardan cəmi 5-i milli üzvüdü. Bu mənada, PFL-in rüsum məsələsi "Qarabağ"ın transfer siyasətinə ciddi təsir edir? Daha çox milli komanda üzvlərini axtarmağa sizi məcbur edir?
- Maddi tərəf mənə aid olmayan məsələdi. PFL-in bayrağı altında çıxış ediriksə, nizamnaməyə əməl etməliyik. Amma bəzən elə olur ki, düşünmədiyim transfer olur. Rüsuma görə yox, amma milli üzvlərinə üstünlük veririk. Onların təcrübəsi, daim beynəlxalq oyunlarda iştirak etməsi bizə fayda verir. Bu transfer siyasətimizə problem törətmir.

- Görmək istədiyiniz Adama Diakabini görürsüz?
- Belə oyunlar futbolçuya və mənə ümid verir. Baxmayaraq ki, iki oyunda qol vurub, bu gün də onun idman formasından razı deyiləm. Böyük potensiala malikdi, böyük liqalarda oynayıb. Bu, davamlı olacaqsa, niyə də ondan istifadə etməyək? İnsanın özündən, peşəkarlığından da çox şey asılıdı. Daim çalışmalıyıq ki, stabilliyi qoruyub-saxlayaq. Üç oyunda qalib gəliriksə, o demək deyil ki, 4-5 ci oyunda uduzmaq limitimiz var, belə deyil. Stabilliyi saxlasa, avrokuboklarda da oynamaq ehtimalı var.

- Qapıçılardan biri icarəyə veriləcək?
- Heç bir klubla danışıq getmir. Bəzən hansısa oyunçu daim oynamaq istəyir. Olsa, bunu nəzərdən keçirəcəyik. Olmasa da, hər dörd qapıçı bizimlədi.