"Vacib üç xal qazandıq"
Misli premyer-liqasında 29-cu tura yekun vurulub.
"Football-plus.az" xəbər verir ki, "Qarabağ" "Kəpəz"i qəbul edib - 3:1. Oyundan sonra ağdamlıların çalışdırıcısı Qurban Qurbanovun mətbuat konransı keçirilib. Sizi mütəxəssisin fikirləri ilə tanış edirik:
“Futbolçularımı təbrik edirəm. Gərgin oyun oldu. Qələbə üçün çox əziyyət çəkdik. Ümumiyyətlə, rəqibimiz son oyunlar baxımlı futbol oynayır. Sürətli hücumlar edirlər. Müdafiədə bir neçə səhv xaric, rəqibin qarşısını ala bildik. Vacib üç xal qazandıq. “Kəpəz”ə uğurlar arzu edirəm".
- Məğlubiyyətsiz çempionluğa doğru gedirsiz. Bu haqda nə deyə bilərsiz?
Dünya futbolunda da məğlubiyyətsiz çempionluqlar yaşanır. Ötən il bir məğlubiyyətimiz olmuşdu. İstərdim ki, uduzmadan çempion olaq. Hələ məqsədə çatmamışıq. Qarşıda 7 oyun var. Hər oyun bizim üçün çox önəmlidi. Futbolda elə olur ki, düşünmədiyin oyunlarda uduzursan.
- Yeni transferlərdən gözlədiyinizi ala bilirsizmi?
- Yeni transferlərdən daha yaxşı performans gözləyirdim. Düşündüklərim özünü hələlik doğrultmur. Amma ümid edirəm ki, onlar getdikcə daha da yaxşı olacaqlar. Komandada yeni futbolçular olanda adaptasiya müddəti üçün vaxt lazım olur.
- Çempionatın sonuna doğru futbolçularda fiziki və psixoloji yorğunluqlar yaranır. Bunun qarşısını almaq üçün nə edirsiz?
- Bizdə futbola yanaşma tam fərqlidi. Əlbəttə, istərdim ki, sona qədər istəkli, yaxşı formada çıxış edək. Yorğunluğun öz təsiri olacaq. Millidə çıxış edən futbolçular daha yorğun olar. Mövsümün sonuna yaxın istirahət vaxtını gözləyirsən. Bizim işimiz elədi ki, sona qədər çalışmalısan.
- "Qarabağ"ın bir neçə futbolçusunun Avropa klublarının hədəfində olduğu bildirilir. Bu haqda nə deyə bilərsiz?
- Futbolçularımın xarici klublarla adının çəkilməsi normal haldı. İl ərzində bu proses gedir. İş orasındadı ki, bəzi futbolçuları əldə etmək üçün menecerlər futbolçularla əlaqəyə keçirlər. Onlar oyunçunun fikirlərini yayındırmağa çalışırlar. Futbolçularım üçün rəsmi təklif almamışıq.
- "Qarabağ" inkişaf etdikcə bu cür təklifərin sayı artır. Bunun işinizə mənfi təsirləri nələrdi?
- Əfsuslar olsun ki, təklif məsələləri bizim işimizə mane olur. Biz yaxşı kollektiv formalaşdırmağa çalışırıq ki, oyunumuz da yaxşı alınsın. Futbolçu gedəndə də problem olur, getməyəndə də. Sürətdə, gücdə uduza bilərik, amma oyuna baxdıqda, stabilliyi qoruyub saxlaya bilmişik. Problemlər olduqda böyümək daha yaxşı olur. Xarici klublardan təkliflərin ziyanı da olur, faydası da.
İSMAYIL XEYRULLAYEV
Digər xəbərlər
