"Ən çətin qrupa düşmüşük. Baş məşqçi Ataman Güneyligilin və oyunçuların da açıqlamalarından görürük ki, ilk hədəf qrupdan çıxmaqdı. Almaniya, Türkiyə çox güclü komandalardı. İsveç voleybolu da gündən-günə inkişaf edir. Çexiya millisinə qalib gələcəyimiz halda, növbəti oyunlarda hazırlaşmaq rahat olacaq. Çünki qızlarımız motivasiyalı olacaq. İnşallah, millimiz bizi bu turnirdə sevindirər. Ölkəmizə qələbələr çox vacibdi".

“Komandamızın hazırlıq prosesini yaxından izləyirdim. Hətta yığma Bosniya və Hersoqovinada olarkən məşqçilərlə əlaqə saxlayırdım. Baş məşqçinin seçiminə qıraqdan nəsə demək çətindi. Mən olsaydım, Ülkər Kərimova ilə Şəfaqət Alışanovanı da aparardım. Çünki onlar öz mövqeyində ən yaxşılardan biridi. Ülkər ötən mövsüm həm libero, həm də hücumçu kimi özünü yaxşı tərəfdən göstərdi. Həmçinin komandaya top qəbulunda böyük xeyri dəyərdi. Şəfaqətin də nəyə qadir olduğunu bilirik. Toppaylayıcı funksiyasını əla yerinə yetirir. O, komandanın "motor"udu. Təcrübəsi ilə yığmaya güc qatacaqdı. Lakin bu seçim baş məşqçinindi. Buna da hörmətlə yanaşmalıyıq. Hazırda heyətimizdə olan oyunçular da yetərincə güclüdü. İnanıram ki, uğurlu nəticə qazanacağıq".