"Səbail" dünən Misli premyer-liqasının 2-ci turunda "Neftçi" ilə qarşılaşdı.

Oyun heç-heçə bitdi. İlk oyunu məğlubiyyətlə başa vuran komandalara dünən qələbə çox vacib idi. Start fitindən etibarən başlayan qarşılıqlı hücumlardan da bunu görmək olurdu. "Sumqayıt"la oyunda “dişsiz” görünən Şahin Diniyevin yetirmələri "ağ-qaralar"la qarşılaşmada tam fərqli oyun sərgiləyirdi. "Dənizçilər"in cəhdləri 33-cü dəqiqə bəhrə verdi. Paytaxt təmsilçisinin yeni transferi Pedro Nuno İvan Brkiçlə dueldən qalib ayrılaraq topu tora göndərdi. İkinci hissədə isə Səlahət Ağayevin inamlı oyunu da komandasına bəzi epizodlarda kömək oldu. Lakin 80-cı dəqiqədə Süleyman Əhmədovun cərimə meydançası daxilində topla lazımsız hərəkəti komanda yoldaşlarının zəhmətini yerə vurdu. 23 yaşlı müdafiçinin Kenni Sayefə qarşı kobudluğunu baş hakim Rauf Cabbarov dərhal penalti ilə cəzalandırdı. Bax, bu da 80 dəqiqə ərzində çəkdiyin əziyyətin mənasız sonu. Yəqin Süleyman bundan sonra dünənki hərəkətindən dərs götürər və bir də belə mənasız səhvə yol verməz. O səhv ki komandasını çox ehtiyac duyduğu 3 xaldan etdi.

CAVİD ƏLİYEV