“US Open”in mükafat fondu rekord həddə çatdırıldı
Builki ABŞ Açıq Çempionatında mükafat fondu rekord həddə çatdırılıb.
“Football-plus.az” xəbər verir ki, bu haqda məlumatı ABŞ Teniis Assosiasiyasına istinadla AP yayıb. Agentlik bildirir ki, söhbət 65 milyon dollardan gedir. Ötən il “US Open”in mükafat fondu 60 milyon dollar olub.
Xatırladaq ki, ABŞ Açıq Çempionatı bu il 28 avqust – 10 sentyabr aralığında keçiriləcək. “Böyük dəbilqə” seriyalı bu turnirin son qalibi ispaniyalı Karlos Alkarasdı. O, ötənilki finalda norveçli Kasper Ruudu məğlub etmişdi - 6:4, 2:6, 7:6 (7:1), 6:3.
“US Open”in startı yaxınlaşdıqca tennis dünyasında ən müxtəlif proqnozların və fikirlərin səslənməsi təbiidi. Britaniyalı tennisçi Endi Marrey belə hesab edir ki, sonuncu “Uimbldon” turnirində dünyanın 1-ci raketkası Karlos Alkarasa uduzduğuna görə Novak Cokoviçi qiymətləndirməmək olmaz:
“Artıq Cokoviçi hesabdan silmək çox ədalətsiz olardı. Alkarasın “Uimbldon”un finalındakı qələbəsi yeni eranın başlanğıcının əlaməti ola bilər. Ancaq Cokoviç bu il keçirilən üç “Böyük dəbilqə” turnirindən ikisinin qalibi olub, üçüncüdə də qələbəyə yaxın idi”.
Cokoviçin məşqçisi Qoran İvanişeviç də kimin “US Open”də Alkarasa mane ola biləcəyi haqda danışıb:
“Sinner və Novak Karlosa təhlükə yarada biləcək tennisçilərdi. Sinnerin oyun üslubu Alkaras üçün uyğun deyil, onlar arasında maraqlı oyunlar olub. Ondan başqa Medvedev də yaxşı günündə fenomenal tennisçidi. Novak isə sonuncu dinozavrdı. Qalan iddialılar gənc oğlanlardı. Və Alkarasla uzun oyunda Sinnerlə Cokoviçdən başqa heç kim davam gətirə bilməz. İspaniyalının tempinə uzun müddət dözə bilməyənlər dərhal raketkalarını toplayıb evə yollana bilər”.
Xatırladaq ki, hazırda hesabında 9225 xal olan Alkaras ATP reytinqinə başçılıq edir. Cokoviç 8795 xalla 2-ci pillədə qərarlaşıb. 36 yaşlı serb tennisçi “Böyük dəbilqə” seriyalı turnirlərdə qələbə sayına (23) görə rekordçudu.
Bu arada iddialı tennisçilərdən Nik Kiriosun da Sinsinnati və “US Open” turnirlərini buraxacağı məlum olub. Onun “Masters” seriyalı turnirin 2-ci dövrəsinə görə 45 və “Böyük dəbilqə”nin 1/4 finalına göra 360 reytinq xalı “yanacaq”. Belədə avstraliyalı sentyabrda “top-500”ün sonuna düşəcək.
Kirios 2023-cü ildə yalnız bir rəsmi oyun keçirib. O, əvvəlcə dizindəki əməliyyata görə bərpa dövrü keçib, indi isə bilək zədəsindən əziyyət çəkir. Sinsinnati turnirinin əsas torunda Niki Emil Ruusuvuori, “US Open”də isə Dieqo Şvartsman əvəz edəcək. Yan-Lennar Ştruff da adı çəkilən turnirlərdən çəkilib. “Masters” seriyalı turnirdə onun əvəzinə Lloyd Harris, “Böyük dəbilqə”də isə Fakunda Dias Akosta oynayacaq.
Digər xəbərlər
