"Neftçi" çərşənbə günü daha bir futbolçu ilə müqavilə imzaladı. Söhbət Aaron Olanaredən gedir.

"Football-plus.az" xəbər verir ki, flaqman nigeriyalı vingerlə birillik müqavilə bağladı.

29 yaşlı forvardın "ağ-qaralar"da uğurlu olub-olmayacağını zaman göstərəcək. Amma indidən deyə bilərik ki, Olanare flaqmanda yaxşı oynamaq məcburiyyətindədi. Nigeriyalı “Neftçi”yə azad agent kimi keçdi, bir il idi futbolsuz qalmışdı. Ümumiyyətlə, Olanare üç dəfə klubsuz qalıb. Sonradan özünə iş yeri tapa bilib.

Gəlin, hücumçunun karyerasına diqqət yetirək. Aaron 2011/12 mövsümündə ölkəsinin "Dolfin" klubunda futbolçu həyatına qədəm qoyub. İki mövsümdən sonra Norveç macərası başlayıb. Əvvəlcə "Volerenqa"da (2012/13), daha sonra "Sarpsborq"da (2013/14) çıxış edib. 2014-cü ildən Çində top qovmağa başlayıb. Burda "Quançjou" ilə müqavilə bağlasa da, özünü yaxşı tərəfdən göstərə bilməyib. Rusiyanın ÇSKA klubuna icarəyə verilib. 2016/17 mövsümündə Moskva klubuna azad agent kimi keçib. Bundan sonra nigeriyalının uğursuz günləri başlayıb. ÇSKA-dan "Amkar"a (2017/18) icarəyə göndərilib. Daha sonra geri qayıdan Olanare 2018/19 mövsümündə 3 ay klubsuz qalıb. Oktyabrda isə İsrailin "Yerusəlim" kollektivinə keçib. Həmin mövsümün qışında Çin klublarından "Lonqfor"a, yayda isə "Çançun"a icarəyə göndərilib. Bununla da ikinci dəfə Olanarenin komandasız günləri başlayır. Lakin birillik fasilədən sonra Türkiyənin "Ərzurumspor" klubunda oynamaq şansı qazanır. Burda 2 mövsüm top qovan oyunçu yayda komandası ilə yeni müqavilə imzalamır. Uzun danışıqlardan sonra "Neftçi"yə keçid edir.

Olanare karyerası ərzində 217 matçda 73 qol vurub, 24 məhsuldar ötürmə verib. Nigeriya millisinin də üzvüdü. Burda 7 qarşılaşmada meydana çıxaraq 2 qol vurub.

Gördüyünüz kimi, Olanarenin keşməkeşli karyerası olub. İndi o ya "Neftçi"də uğurlu oyun sərgiləyərək futbolçu həyatının sonlarında əfsanə kimi yadda qalacaq, ya da Afrikanın hansısa ölkəsinə transfer olunaraq daha 2-3 il oynayandan sonra tarixin tozlu səhifələrində yox olacaq...

İLKİN SULTANLI