Azərbaycan premyer-liqasının qəribə özəllikləri var. Məsələn, “transfer pəncərəsi” üçün müəyyənləşən vaxt məhdudiyyətinin, demək olar ki, ölkəmizə dəxli yoxdu. Klublar mövsümün sonuna 3 tur qalanda da heyətini azad agent statusuna malik oyunçularla gücləndirə bilərlər.

Cari mövsüm üçün hədəfinə çatması sual altında olan “Sabah” da son günlərdə heyətinə yeni futbolçu qatıb. Əlbəttə, bu transferdə Rusiyanın Ukraynana təcavüzü önəmli rol oynayıb. Bəli, mövsümün qışaqədərki hissəsini “Vorskla”da keçirən Lukas Rangel artıq ustalığını Masazırda göstərəcək.

184 sm boya, 76 kq çəkiyə malik, 29 dekabr 1994 doğumlu hücumçu “Sabah”a kimi bir çox klublarda forma geyib. 27 yaşlı forvard peşəkar karyerasına ölkəsində başlayıb. “İtumbiara”da forma şansı əldə edə bilməyən Rangel “Londrina”ya icarəyə verilib. Forvard burda da meydana çıxa bilməyib. Bundan sonra “Sabah”ın yeni forvardının Avropa macərası başlayıb. 2016/17 mövsümünü Albaniyanın “Kukesi” klubunda keçirən hücumçu 28 matçda meydanda olub. Bu görüşlərdə rəqiblərini 3 dəfə məyus edib. Burda Avropa Liqasının təsnifat mərhələsində 4 matçda meydanda olan Rangel 2017/18 mövsümündə Avstriyaya yollanıb. “Kapfenberger” 31 matçda meydanda olan hücumçu 9 qol vurub, 3 assistlə diqqəti çəkib. 2018/19 mövsümündən 250 min avroya transfer olunduğu Finlandiya “Kups”unda isə 83 matçda meydanda olub. Bu görüşlərdə 30 qol vurub, 8 assist edib. 2020/21 mövsümünün ikinci yarısında “Adana Dəmirspor”a keçən braziliyalı 7 görüşdə meydanda olur. O, bu oyunlarda fərqlənə bilməyib, geri qayıdır. 2021/22 mövsümünün əvvəlində Ukraynanın “Vorskla” klubuna keçən Rangel burda 13 matçda meydanda olur. Rəqiblərini 4 dəfə məyus edən hücumçu 1 assist də etməyi bacarır. Ukraynada baş verən müharibəyə görə komandasından ayrılan hücumçunun yeni iş yeri “Sabah”dı. Onun burda necə çıxış edəcəyini isə zaman göstərəcək.

Maraq üçün qeyd edək ki, Rangel Azərbaycan premyer-liqasında çıxış edən və etmiş bəzi futbolçularla komanda yoldaşı olub. Braziliyalı “Kukesi”də oynayan zaman “Qəbələ”nin sabiq üzvü Sabien Lilay da Albaniya təmsilçisinin şərəfini qoruyub. Rangelin “Kups” karyerası da maraqlı olub. Həmin dövrdə Azərbaycan millisinin sabiq üzvü Cem Fələk və bir vaxtlar “Simurq”da çıxış etmiş İqor Tarasov da hücumçu ilə komanda yoldaşı olub. Deyə bilərik ki, Lukas “Sabah”da darıxmayacaq. Çünki “Adana Dəmirspor”da çıxış edən zaman onunla komanda yoldaşı olan Mixeil Erqemlidze paytaxt təmsilçisinin heyətində çıxış edir. Yeri gəlmişkən, “Vorskla”nı çalışdıran Yuri Maksimov da Azərbaycan publikasına tanışdı. Görünür, braziliyalı futbolçu ölkəmizə gəlməyə qərar verərkən onunla da məsləhətləşib.

İLKİN SULTANLI