"Neftçi" dünən daha bir futbolçu ilə müqavilə imzaladı. Söhbət Aaron Olanaredən gedir. Flaqman nigeriyalı vingerlə 1 illik müqavilə imzaladı.

29 yaşlı forvardın "ağ-qaralar"da uğurlu olub-olmayacağını zaman göstərəcək. Amma indidən deyı bilərik ki, Olanare flaqmanda yaxşı oynamaq məcburiyyətindədi. Nigeriyalı azad agent olaraq Bakı klubuna keçdi. Hücumçu 1 il idi ki, futbolsuz qalmışdı. Ümumiyyətlə, Olanare 3 dəfə klubsuz qalıb. Sonradan özünə komanda tapa bilib.

Gəlin, hücumçunun karyerasına diqqət yetirək. Aaron 2011/12 mövsümündə ölkəsinin "Dolfin" klubunda futbolçuluq həyatına qədəm qoyub. 2 "futbol ili"ndən sonra Norveç macərası başlayıb. Əvvəlcə "Volerenqa" (2012/13), daha sonra "Sarpsborq"da (2013/14) çıxış edib. 2014-cü ildən isə Çində top qovmağa başlayıb. Burda "Quançjou" ilə müqavilə bağlasa da, özünü yaxşı tərəfdən göstərə bilməyib. Rusiyanın ÇSKA klubuna icarəyə verilib. 2016/17 mövsümündə Moskva klubuna azad agent olaraq keçib. Bundan sonra nigeriyalının uğursuz günləri başlayıb. ÇSKA-dan "Amkar"a icarəyə (2017/18) icarəyə göndərilib. Daha sonra geri qayıdan Olanare 18/19 mövsümündə 3 ay klubsuz qalıb. Oktyabrda isə İsrailin "Yerusalim" kollektivinə keçib. Həmin mövsümün qışında Çinin "Lonqfor", yayda isə "Çançun"a icarəyə göndərilib. Bununla da yenidən Olanarenin ikinci dəfə komandasız günləri başlayır. Lakin 1 illik fasilədən sonra Türkiyənin "Ərzurumspor" klubunda oynamaq şansı əldə edir. Burda 2 mövsüm top qovan oyunçu yayda komandası ilə yeni müqavilə imzalamır. Uzun danışıqlardan sonra "Neftçi"yə keçid edir.

Olanare karyerası ərzində 217 matçda 73 qol vurub, 24 məhsuldar ötürmə edib. O, Nigeriya millisinin də üzvüdü. Burda 7 qarşılaşmada meydana çıxaraq 2 qol vurub.

Gördüyünüz kimi, Olanarenin keçmə-keşli karyerası olub. Oyunçu ya "Neftçi"də uğurlu performans sərgiləyərək futbolçu həyatının sonlarında əfsanə olaraq yadda qalacaq. Ya da Afrikanın hansısa ölkəsinə transfer olunaraq daha 2-3 top qovaraq tarixin tozlu səhifələrində yox olacaq...

İLKİN SULTANLI