“Mançester Yunayted”in rəhbərliyi baş məşqçi Erik ten Haq və yetirmələri üçün yeni istirahət otağı yaradıb.

"Football-plus.az" xəbər verir ki, komanda “Old Trafford”da yerləşən həmin otaqdan oyunlardan əvvəl yararlana biləcək. Halbuki ser Bobbi Çarltonun adını daşıyan tribunadakı həmin yer qonaqlar üçün zona kimi nəzərdə tutulmuşdu, yüksək qiymətə bilet alan azarkeşlər burda qərarlaşırdı. Həmçinin korporativ müştərilər də bura baş çəkir, kluba milyon funtlarla ölçülən xeyir verirdi. Ancaq Ten Haq sərəncamında oyunçularla ünsiyyət üçün xüsusi yer olmasını istəyib. Rəhbərlik də onun bu istəyini anlayışla qarşılayıb.

Baş məşqçi ötən mövsüm klub rəhbərliyinə deyib ki, oyunlardan əvvəl bütün komanda ilə oteldə qalmaq istəmir, onda klub vəziyyətdən müvəqqəti çıxış yolu tapıb. Ten Haqı anlamaq asandı: o hesab edir ki, stadiona aparan yoldakı tıxaclar, təhlükəsizlik problemləri, təklif olunan qidalar nəticələrə təsir göstərə bilər. Baş məşqçinin iradının qarşılığında klub ona gözləmə zallarından birini təqdim etdi. MY-yə düz bir il vaxt lazım gəldi ki, stadiondakı otaqlardan birini yenidən qursun, lazımi avadanlıqlarla təchiz etsin. Belədə məşqçi korpusunun işi asanlaşırsa, klub da itirdiyi pulu kompensasiya etməyin yollarını fikirləşməliydi. Yay boyunca otağın yeni təyinat üçün uyğunlaşdırılması həyata keçirildi, indi futbolçular xüsusi zonada qidalanmaq və dincəlmək imkanına malikdi, Ten Haq isə öz funksiyalarını daha yaxşı yerinə yetirə bilər.

Baş məşqçi futbolçuları xəbərdar edib ki, onlar oyuna 3,5 saat qalmış stadiona gəlməlidilər. Oyunöncəsi prosedurları yerinə yetirmək və vahid kollektiv atmosferi yaratmaq üçün bu vacib şərtdi. Ten Haq belə hesab edir ki, “Old Trafford”an kənarda keçirilən bütün vaxt itkidi.

Maraqlıdı ki, Joze Mourinyo, Lui van Qal və Ole-Qunnar Silşer də belə dəyişikliklərin olmasında israr edirdilər, ancaq yalnız Ten Haq istədiyinə nail oldu. MY-nin futbol direktoru Con Merto ilə əməliyyatlar üzrə direktor Kollet Roşun belə qərara razılıq verməsi o deməkdi ki, Ten Haqın klub rəhbərliyinə təsiri böyükdü. Niderlandlı məşqçiyə sələfləri ilə müqayisədə daha çox etibar edirlər.