"Neftçi"ylə ilk matç ərəfəsində "Beşiktaş"ın aparıcı futbolçusu zədələnib. İstanbul klubu "Tirana" ilə cavab görüşündə kapitanı Necip Uysalı itirib. 

Belə ki, ilk hissənin axırına yaxın rəqiblə mübarizədən sonra yerdə qalan mərkəz müdafiəçisi zədələndiyinə işarə etsə də, hissənin sonuna kimi meydanda qalıb. Fasilədə müayinə olunan Necipin görüşü davam etdirə bilməyəcəyi dəqiqləşib və yeni transfer Daniel Amartiylə əvəzlənib. İstanbullular Uysalı hərtərəfli müayinə etdikdən son durumuyla bağlı açıqlama verəcək.

"Beşiktaş"ın konqolu müdafiəçisi Artur Masuakunun isə "Neftçi"yə qarşı oynamayacağı dəqiqdi. Çünki legioner 67-ci dəqiqədə birbaşa qırmızı vərəqə alıb və bununla da UEFA-nın 2 matçlıq cəzasına məruz qalacaq. 

Baş məşqçi Şenol Günəş "Tirana"ya 2:0 hesabıyla qalib gələrək mərhələ adladıqları cavab görüşündən sonra mətbuat konfransında "Neftçi" haqda da danışıb: "İki matçda qələbə qazanaraq mərhələ keçmək bizim üçün önəmlidi. Haqq etdiyimiz bir qələbəni qazandığımızı düşünürəm. Bizim üçün gözəl axşam oldu. Rəqibimiz "Neftçi" oldu. Onları 3-cü təsnifat mərhələsinə çıxmaları münasibəti ilə təbrik edirəm".

Bu arada “Neftçi”nin “Beşiktaş”a qarşı keçirəcəyi səfər oyununun hakimləri müəyyənləşib. Avqustun 17-də keçiriləcək oyun Avstriyadan olan hakimlər briqadasına tapşırılıb. İstanbulda gerçəkləşəcək matçda Yulian Veinberger ədaləti qoruyacaq. Ona Andreas Vitşniqq və Sara Telek kömək edəcək. Görüşün ehtiyat hakimi Ştefan Ebner olacaq.
“Beşiktaş” – “Neftçi” oyunu Bakı vaxtı ilə saat 21.00-da başlayacaq. Bu komandalar arasında ilk görüş isə ayın 10-da “Neftçi Arena”da keçiriləcək.

Əslində ilk oyun səfərdə, cavab görüşü Bakıda keçirilməliydi. Ancaq avqustun 10-da “Fənərbaxça” da Konfrans Liqasındakı ilk oyununu İstanbulda keçirəcəyindən, UEFA “Beşiktaş”ın səfərə yollanmasını qərara alıb. Belədə isə azərbaycanlı azarkeşlər üçün əcaib vəziyyət yaranıb. İş ondadı ki, avqustun 10-da “Qarabağ”la “Sabah” da evdə oynamalıdı. Çox maraqlıdı, Bakı yaxın saatlarda keçirilən üç oyunun ağırlığına necə dözəcək?