Bilindiyi kimi Konfrans Liqasının 3-cü təsnifat mərhələsində futbolumuzun flaqmanı ''Neftçi''nin yolu İstanbul nəhəngi ''Beşiktaş'' ilə kəsişib.

"Football-plus.az" xəbər verir ki, ilk oyun avqustun 10-da paytaxtımızda, cavab oyunu isə avqustun 17-də İstanbulda keçiriləcək.

Bu duel barədə mühüm bir xəbər var. ''Beşiktaş''ın fanatları üzündən 2-ci təsnifat mərhələsində ''Tirana'' ilə cavab oyunu 15 dəqiqə gec başlamışdı. Albaniyadakı qarşılaşmadan öncə türkiyəli fanatlar onlar üçün ayrılan sektorda petardlar yandırmış və meydana yad cisimlər atmışdılar. Buna cavab olaraq ''Tirana'' fanatları onların üstünə hücum etmək istəmişdi. Matçın hakimi oyunçuları paltardəyişmə otağına yollanmağa çağırmışdı. Amma polislərin və mühafizə xidməti işçilərinin müdaxiləsi ilə aranı sakitləşdirmək mümkün olmuşdu. Bu hadisə ''Beşiktaş''a baha başa gələ bilər.

Belə ki, UEFA olayı araşdırmağa başlayıb. Hakim və hakim-inspektorların raportlarındakı qeydlər incələnəcək. Belə hallarda ilk öncə para cəzası verilir. Amma ''Beşiktaş'' daha öncə UEFA-dan bununla bağlı xəbərdarlıq və para cəzası aldığından bu dəfə İstanbul nəhəngi daha sərt cəza ilə üzləşə bilər. Eyni hadisə təkrar olunduğu üçün bu dəfə İstanbul nəhəngi ən azı 1 oyunluğa azarkeş dəstəyindən məhrum edilə bilər! Komanda növbəti ev oyununu ''Neftçi'' ilə keçirəcəyindən həmin qarşılaşmanın azarkeşsiz oynanılması ehtimalı yaranıb. Ya da ola bilər ki, stadiona yalnız qonaq azarkeşlər buraxılsın.

ƏLİ