“Beşiktaş”ın sektorunda 1000-ə yaxın azarkeş olacaq
Bu gün “Beşiktaş”la qarşılaşacaq “Neftçi” srağagün rəsmi açıqlama yayaraq bəyan etdi ki, İstanbul klubunun azarkeşləri üçün xüsusi sektor ayrılacaq.
Deməli, Türkiyədən gələcək və ölkəmizdə yaşayan “Beşiktaş” azarkeşləri bu sektora bilet əldə etmək üçün adı çəkilən komandanın müvafiq qurumları ilə əlaqə yaratmalıdı. Belə durumda “qara qartal”ın ölkəmizdəki azarkeşləri necə davranacaq?
"Football-plus.az"olaraq bu sualla "Beşiktaş Azərbaycan" fanklubunun təsisçisi Məzahir Alcanova üz tutduqda belə dedi:
"Oyunu səbirsizliklə gözləyirik. Məndə olan məlumata görə, "Beşiktaş"a aid sektorun biletləri hələ satışa çıxarılmayıb. "Beşiktaş" rəhbərliyi mövqeyini bildirəndən sonra oyuna gedib-getməyəcəyimiz dəqiqləşəcək". Dünən Məzahir bəylə əlaqə saxladıqda isə belə dedi: "Bizə stadionda 5A sektoru ayrılıb. Ölkəmizdəki "Beşitkaş"sevərlər və Türkiyədən gələn fanatlar birləşərək stadiona getməyi planlaşdırırıq. Təxminən 900-1000 nəfər fanatın yer alacağını gözləyirik".
"Neftçi"nin mətbuat katibi Rüstəm Allahverdiyev də məsələ ilə bağlı qəzetimizə açıqlama verdi: "Beşiktaş” fanatları üçün bəlli sektor və lazımi qədər bilet ayrılıb. Biletləri Türkiyə təmsilçisi azarkeşlərinə satacaq".
ABDULLA İSMAYILOĞLU
Digər xəbərlər
