Bu gün Bakıda böyük futbol bayramı yaşanıb. İki komandamız Konfrans Liqasının 3-cü təsnifat mərhələsinin ilk oyununu keçirib.

"Football-plus.az" xəbər verir ki, "Sabah" "Partizan"ı, "Neftçi" "Beşiktaş"ı qəbul edib. "Bayquşlar"ın oyunu İTV-də, "ağ-qaralar"ın dueli isə "CBC Sport"da canlı yayınlanıb.

Konfrans Liqası
3-cü təsnifat mərhələsi, ilk oyun
Sabah - Partizan (Serbiya) 2:0
Boyan Letiç, 70, 74
"Sabah": 1. Yusif İmanov, 2. Amin Seydiyev, 7. Boyan Letiç, 9. Anatoli Nuriyev, 10. Aleksey İsayev, 12. Vinsent Till, 15. Kristian da Silva, 19. Emmanuel Apeh, 24. Maruan Hadudi, 27. Jarl Marqarita, 44. Sofian Çakla.
Baş məşqçi: Murad Musayev.
"Partizan": 1. Aleksandr Yovanoviç, 3. Mixaylo İliç, 5. Nikola Antiç, 6. Svetozar Markoviç, 7. Severina Xander, 8. Frank Elimane Kanute, 9. Kuinsi Meniq, 11. Matheus Saldanya, 15. Aldo Kalulu, 26. Aleksandr Filipoviç, 40. Kristiyan Beliç.
Baş məşqçi: İqor Dulyay.
Hakimlər: GİORGİ KRUAŞVİLİ, Levan Varamişvili, Zaza Pipia, Aleko Aptsiauri (hamısı Gürcüstan).
Hakim-inspektor: Lusilio Batista (Portuqaliya).
UEFA nümayəndəsi: Aleksandr Aleynik (Belarus).
10 avqust. Bakı. "Bank Respublika Arena". Saat 20.00.

"Sabah" avrokuboklarda meydana çıxdığı ilk iki qarşılaşmada tarix yazdı. Hər iki görüşdə qalib gələn bakılıları indi daha çətin sınaq gözləyir. "Bayquşlar"ın azarkeşləri, həm də rəhbərliyi komandadan daha yaxşı nəticələr gözləyir. Lakin bunun üçün "Partizan"ı üstələmək lazımdı. İlk oyunun Bakıda keçirilməsi müəyyən üstünlük ola bilər. Lakin serblərin avrokubok təcrübəsini nəzərə alsaq, favorit məhz onlardı. Düzdü, Belqrad təmsilçisində hazırda maliyyə problemləri var. Ancaq heç bir maliyyə problemi "Sabah"ın almaniyalı futbolçusu Coy-Lens Mikelsin hoqqasına bərabər tutula bilməz. Dünən Murad Musayevə komandadanı ayrılmaq istədiyini deyən birinin bu gün meydanda görünməməsi tam realdı.

Bu, "Partizan"ın Azərbaycan klubları ilə ilk sınağı deyil. "Ağ-qaralar" 6 dəfə bizimkilərlə üz-üzə gəlib. Belqrad klubu bu qarşılaşmaların 3-də qələbə qazanıb, daha 3-də heç-heçə edib. Serbiya futbolunun flaqmanı təmsilçilərimizi 9 dəfə məyus edib, öz qapısından isə 5 qol buraxıb.

29.07.2008. Bakı. ÇL. İnter – Partizan 1:1
06.08.2008. Belqrad. ÇL. Partizan – İnter 2:0
20.09.2012. Belqrad. AL. Partizan – Neftçi 0:0
22.11.2012. Bakı. AL. Neftçi – Partizan 1:1
21.08.2014. Belqrad. AL. Partizan – Neftçi 3:2
28.08.2014. Bakı. AL. Neftçi – Partizan 1:2

Neftçi - Beşiktaş (Türkiyə) 1:3
Kilan Lebon, 79 - Vensan Abubakar, 14, Cekson Muleka, 24, Salih Uçan, 62
"Neftçi": 1. İvan Brkiç, 21. İsmayıl Zülfüqarlı, 44. Yuri Matias, 4. Mark Tamaş, 19. Azər Salahlı, 23. Ataa Caber, 8. Emin Mahmudov (k), 27. Fərid Yusifli, 5. Kenni Sayef, 11. Kilan Lebon, 9. Andre Şinyaşiki.
Ehtiyat oyunçular: 93.Rza Cəfərov, 3.Höccət Haqverdi, 10. Filip Ozobiç, 17.Rəhman Hacıyev, 25. Aaron Olanare, 37.Elton Əlibəyli, 41 Samir Həsənov, 77.Yeqor Boqomolski, 82. Rüfət Abbasov, 99.Ervin Koffi.
"Beşiktaş": 34. Mert Günok (k), 77. Umut Meraş, 6. Omar Kolli, 12. Daniel Amarti, 24. Valentin Rozyer, 19. AMir Hadjiahmetoviç, 83. Gedson Fernandes, 8. Salih Uçan, 40. Cekson Muleka, 4. Onur Bulut, 10. Vensan Abubakar.
Ehtiyat oyunçular: 1. Ersin Destanoğlu, 97. Utku Yuvakuran, 3. Fransisko Montero, 7. Ante Rebiç, 17. Kərəm Kesgin, 20. Necip Uysal, 21. Dəmir Tıknaz, 23. Kartal Yılmaz, 41. Oğuzhan Akgün, 71. Cin Onana, 90. Semih Kılıçsoy, 99. Emrecan Bulut.
Hakimlər: LUKAS FANDRİX, Conas Erni, Guillom Mayre, Yonnas von Mandax (hamısı İsveçrə).
Hakim-inspektor: Cerrard Perri (İrlandiya).
UEFA nümayəndəsi: İlona Tkaç (Belarus).
10 avqust. Bakı. "Neftçi Arena". Saat 21.00.

2-ci təsnifat mərhələsində "Jelezniçar"ı mübarizədən kənarlaşdıran "Neftçi"də vəziyyət o qədər də yaxşı deyil. Çempionatda "Kəpəz"ə uduzan "ağ-qaralar"da hücumçu çatışmazlığı hiss olunur. Düzdü, dünən Olanare komandaya cəlb olunub və onun adı UEFA-ya göndərilib. Lakin futbolçunun kollektivə uyğunlaşıb-uyğunlaşmadığını bilmirik.

Görüşün favoriti, heç şübhəsiz, İstanbul təmsilçisidi. Düzdü, Şenol Günəş 6 futbolçunu Bakıya gətirməyib. Bunlar Əmir Yaşar, Göktuğ Baytəkin, Artur Masuaku, Aytuğ Kömeç, Rəşid Gezzal, Berkay Vardar, Əmirhan Delibaş, Cenk Tosun, Azad Dəmir və Mustafa Həkimoğludu. Bunlardan üçü o qədər də vacib oyunçu deyil. Raşid Gezzalla Cenk Tosun zədəli, Artur Masuaka isə cəzalı olduğu üçün matçda iştirak edə bilməyəcək.

Ümumiyyətlə, bu klublar avrokuboklarda ilk dəfə üz-üzə gəlirlər. Lakin "Neftçi" Türkiyə təmsilçisi ilə bir dəfə qarşılaşıb. 2020-ci ildə Bakıda keçirilən Avropa Liqasının 2-ci təsnifat mərhələsindəki görüşdə "Qalatasaray" flaqmanı 3:1 hesabıyla məğlub edib.