“Çelsi” növbəti transfer əməliyyatlarını reallaşdırıb.

“Football-plus.az” xəbər verir ki, İngiltərə klubuna iki yeni oyunçu qoşulacaq. Lesli Uqoçukvuya görə “Renn”ə 27,5 milyon avro ödəniləcək. Fransa klubunu yetirməsinin londonlularla razılaşdırılan müqaviləsinin müddəti 7 illiyə nəzərdə tutulub. Lesli “Renn”də keçirdiyi 60 oyunda 1 qolun və 1 məhsuldar ötürmənin müəllifi olub.

Aksel Disasi də bundan sonra “Çelsi”də çıxış edəcək. “Sky Sports”un məlumatında onun paytaxt klubuna 45 milyon avroya başa gələcəyi bildirilir. “Mançester Yunayted” və “Nyukasl”ın da hədəfində olan müdafiəçinin londonlularla 6 illik müddətə anlaşdığı xəbər verilib.

“Çelsi”yə tezliklə daha bir futbolçunun qoşulacağı gözlənilir. “Brayton”un qapıçısı Robert Sançesin londonlulara keçidinin zaman məsələsi olduğu iddia edilir. İspaniyalı futbolçu yaxın günlərdə “zadəganlar”ın sıralarında tibbi baxışdan uğurla keçəndən sonra yeni klubu ilə müqavilə imzalaya biləcək.

Yeri gəlmişkən, “Çelsi” Levi Kolvillə müqaviləni yeniləyib. 20 yaşlı mərkəz müdafiəçisi “6+1 il”lik müqavilə imzalayıb. İngiltərəli müdafiəçi ötən mövsüm icarə əsasında “Brayton”da çıxış edib. Levi premyer-liqada 17 oyun keçirib və 2 məhsuldar ötürmə edib.

Ondan fərqli Omari Hatçinson London klubunu tərk edib. Yamayka yığmasının 19 yaşlı yarımmüdafiəçisi birilliyə “İpsviç”ə icarəyə verilib.