Mixail Mudrikin tezliklə Londonda peyda olacağı gözlənilirdi.

Football-plus.az xəbər verir ki, fərq ondadı ki, ukraynalı futbolçu “Arsenal”da yox, “Çelsi”də qərar tutub.

“Çelsi” bazar günü “Şaxtyor”un oyunçusunu transfer etdiyini rəsmən açıqlayıb. Paytaxt klubu 22 yaşlı yarımmüdafiəçi ilə müddəti 2030-cu ilin yayınadək razılaşdırılan müqavilə bağlayıb. Böyük Britaniya mənbələri “Çelsi”nin bu transfer üçün Donetsk klubuna 70 milyon avro ödəyəcəyini xəbər verib. Müqavilədəki müxtəlif şərtlər, həmçinin komandanın İngiltərə premyer-liqası və Çempionlar Liqasının qalibi olması halında “Şaxtyor”a əlavə 30 milyon avro bonus ödəniləcək. Bu o deməkdi ki, Mudrik Ukrayna futbolunun yeni rekordçusudu. Belə ki, ondan əvvəl ən bahalı futbolçu Andrey Şevçenko idi. “Milan” sabiq hücumçunu 2006-cı ilin yayında “Çelsi”yə 43,88 milyon avroya satmışdı. Qeyd edək ki, Mudrik bu mövsüm meydana çıxdığı 24 oyunda 10 qol vurub və 8 məhsuldar ötürmə edib.

Bu fakt da maraqlıdı. “Şaxtyor” Mixailin satışından qazandığı pulun bir hissəsini yerli əsgərlərə sərf edəcək. Donetsk klubunun rəsmi saytının məlumatında transfer məbləğinin 25 milyon avroluq hissəsini Ukrayna ordusuna bağışladığı bildirilib.