Gözlənildiyi kimi, “Çelsi” heyətinə yeni futbolçu cəlb edib.

London klubu “Çikaqo Fayr”ın qapıçısı Qabriel Sloninanı transfer edib.

18 yaşlı oyunçu artıq tibbi müayinədən keçərək müddəti 2028-ci il iyunun 30-na qədər razılaşdırılan müqaviləyə qol çəkib. Bu keçid londonlulara 9 milyon avroya başa gəlib. “Çelsi” Qabriel uğrunda mübarizədə “Real”ı qabaqlayıb. Buna əsas səbəb kimi danışıqlarda klubun sahibi Todd Boelinin şəxsən iştirak etməsi göstərilir. Qeyd edək ki, Qabriel londonlularla müqavilə imzalasa da, paytaxt komandasında 2023-cü il yanvarın 1-dən oynayacaq. Həmin vaxta qədər isə “Çikaqo Fayr”dakı çıxışını davam etdirəcək.

Yeri gəlmişkən, “Çelsi”yə Karni Çukvuemeka da qoşulub. Ona görə “Aston Villa”ya 18 milyon avro ödənilib. 18 yaşlı yarımmüdafiəçi də müddəti 2028-ci il iyunun 30-na qədər nəzərdə tutulan müqavilə imzalayıb. Avstriyada doğulan Karni İngiltərə vətəndaşıdı. “Aston Villa”nın əsas komandasında 16 oyun keçirən futbolçu 1 məhsuldar ötürmə edib.