Cordan “Şarlott”un səhm paketini satdı, ancaq klubda qaldı

MBA-nın altıqat çempionu Maykl Cordan “Şarlott”un səhmlərinə nəzarət paketini satıb.

“Football-plus.az” xəbər verir ki, MBA klubu Qeyb Plotikin və Rik Şnellin rəhbərlik etdiyi səhmdarlar qrupuna satılıb. Onlar “Hornets Sports & Entertainment (HSE)” şirkətinin həmsədri olacaq və hər 5 ildən bir klub rəhbərliyində bir-birini əvəz edəcək. “Şarlott”un ilk rəbəri Şnell olacaq.

Sövdələşmə başa çatandan sonra Cordan “Hornets”in səhmlərinin minoritat paketini və klubda təmsilçiliyini qoruyub. Bir müddət əvvəl bu sövdələşmə 3 milyard dollar həcmində dəyərləndirilirdi. Cordan 2006-cı ilin iyununda səhmlərin bir hissəsinə yiyələnməklə klubun sahibi Robert Consondan sonra 2-ci səhmdar olmuşdu. 2010-cu ildə isə 275 milyon dollar ödəməklə klubun səhmlər paketinə nəzarəti ələ keçirdi və MBA-da bu hüquqa yiyələnən ilk basketbolçu oldu.

Altıqat MBA çempionu son sövdələşmə ilə bağlı fikirlərini bölüşüb: “Son 13 il ərzində doğma Şimali Karolina ştatında “Şarlott”un əsas sahibi olmaq imkanı mənim üçün böyük şərəf idi. Bu müddətdə əldə olunan bütün uğurlarla qürur duyuram: meydandakı parlaq oyun anları, “Hornets” adının qayıdışı, 2019-cu ildə Şarlottda Ulduzların oyununun keçirilməsi, HSE-nin bu icmanın əsas dayağına çevrilməsi... Bütün bu illər ərzində “Hornets” azarkeşləri qeyri-adi sadiqlik, ehtiras və loyallıq göstərib. İndi, yəni sahibliyin minoritar səviyyəsinə keçdiyim məqamda idarəçiliyi iki uğurlu, innovativ və strateji liderə - Qeyblə Rikə vermək imkanına görə çox şadam. Bilirəm ki, “Hornets” etibarlı əllərdədi. Komandanın gələcəyini böyük səbirsizliklə gözləyirəm. Yaxın illərdə yeni rolda da kluba dəstəyimi davam etdirəcəm”.