ESPN-in yaydığı xəbərə görə, Maykl Cordan MBA klubu “Şarlott”un satışı üzrə əməliyyatı bitirmək üzrədi.

"Football-plus.az" xəbər verir ki, komanda Qeyb Potkin və Rik Şnallın rəhbərlik etdiyi qrupa satılacaq. Yaxın günlərdə müvafiq müqavilənin imzalanması gözlənilir. MBA yoxlama və təsdiq prosesini başa çatdırandan sonra “Atlanta Hoks”ın minoritar sahibi Şnall və “Hornets”in sahibi Plotkin “Şarlott”un idarəçiləri olacaqlar. Cordan isə MBA draftına qədər basketbol əməliyyatlarına rəhbərliyi davam etdirəcək. Yuxarıda adı çəkilən qaynağa inansaq, sövdələşmə başa çatandan sonra Cordan səhmlərin minoritar paketinə sahib olacaq və klubda mövcudluğunu qoruyacaq.

Xatırladaq ki, Maykl Cordan 2006-nın iyununda “Şarlott”un səhmlərinin bir hissəsinə sahib olmaqla onun sahibi Robert Consonun ardından ikinci səhmdara çevrilmişdi. 2010-cu ildə isə basketbol əfsanəsi klubun səhmlər paketinə nəzarəti ələ keçirmək üçün 275 milyon dollar ödəməklə liqa klubunu əldə edən ilk sabiq MBA oyunçusu olmuşdu.