Misli premyer-liqasında 21-ci turun oyunları keçirilir.

"Neftçi" "Sumqayıt"ı məğlub edib - 2:0. Matçdan sonra qonaqların çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:

- Qış fasiləsindən sonra komanda oyun planında inkişaf edib. Amma fərdi səhvlərdən qollar buraxırsız. Bu, nə vaxta qədər davam edəcək?
- Bunlar futbolçuların üzərində olan şeylərdi. Belə məqamların əziyyətini çəkirik. 3 məğlubiyyəti belə şeylərə görə yaşamışıq. Komanda olaraq rəqibdən daha yaxşı idik. “Neftçi”dən zərrə qədər çəkinmirik. Son zərbə anlarında da çatışmazlıqlar var. Əks halda qollar da vura bilərdik. Neçənci oyundur, mərkəz müdafiəçisiz oynayırıq. Bu da təsir edir. İkinci qolda qayda pozuntusu var idi. Amma əmin deyiləm. İlk qol “Neftçi”nin qapısına vurulsaydı, saatlarla VAR-a baxılardı. Rəqib futbolçulara bir neçə qırmızı vərəqə də verilə bilərdi. Amma bəzi məqamlarla bağlı tam əmin də deyiləm.

- Ehtiyat skamyanız kasaddı...
- Bu, zədəlilərlə bağlıdı. İki mərkəz müdafiəçimiz zədəlidi. Onlardan biri olsa, heyətdəkilərin azı biri ehtiyatda olar. Daha oyunçşu götürməyəcəyik. Transfer pəncərəsi bizim üçün bağlanıb. Kamran Əliyevin sənədləri düzəlsə, problem yaşamayacağıq.

- Səbuhi Abdullazadə qərar verməkdə gecikirdi...
- Analizlərə girsəm, adlar çəkməli olacam. Bu da paltardəyişmə otağında dediklərimlə düz gəlməyəcək. Qoy elə pozitiv olaq.

- Sabiq komandanız “Neftçi” nə iləsə diqqətinizi çəkdi?
- Xeyr, “Neftçi” heç nə ilə diqqətimi çəkmədi. Biz bu gün daha yaxşı oynadıq. Bilirsiz ki, həmişə səmimi danışıram.