Bugünlərdə doğma stadionunda, 35 min azarkeşin önündə yeni oyunçularını təqdim edərək rəqiblərinə gözdağı verən “Qalatasaray” transferləri davam etdirir.

Öncə qeyd edək ki, Günay Güvənçin “Cim-Bom”a keçidi, nəhayət, rəsmiləşdi. Yeni mövsümdə məhz bu təcrübəli əlcək sahibi 2-ci qapıçı statusunda olacaq və Fernando Muslera ilə rəqabət aparacaq. “Qaziantep”ə məxsus olan, ötən mövsümün 2-ci dövrəsini “Kasımpaşa”da keçirən və daha öncə “Beşiktaş”ın şərəfini qoruyan Günayla üçillik müqavilə imzalanıb. Onun illik qazancı 19 milyon lirəyə (təxminən 643 min avro) bərabər olacaq. Bundan başqa, “Qaziantep”ə 250 min avro ödəniləcək. Eyni zamanda “Qalatasaray”ın öz yetirməsi olan 24 yaşlı qapıçı Batuhan Şən də anteplilərə birilliyə icarəyə verilib. Bu müddətdə “sarı-qırmızılar” bu qapıçının maaşını ödəməkdə davam edəcək. Məhz Batuhanın Antep klubuna yollanmaq istəməməsi üzündən bu keçid yubanırdı. Amma bu qapıçını sonda razı salmaq mümkün oldu.

"Football-plus.az" xəbər verir ki, “Qalatasaray”ın bu həftə üçün əsas “bomba”sı Kərəm Dəmirbaydı. Ərdən Timurun neçə müddətdi danışıqlar apardığı təcrübəli yarımmüdafiəçi ilə anlaşmaq mümkün olub. Kərəm srağagün axşam saatlarında İstanbula gəlib. Hava limanında onun ilk sözləri belə olub:

Bu transfer “Qalatasaray”a 3,5 milyon avroya başa gəlib. Kərəm ilə üçillik müqavilə imzalanıb. Qeyd edək ki, 1993-cü il təvəllüdlü Dəmirbay Almaniyanın Herten şəhərində doğulub və Dortmund “Borussiya”sının yetirməsidi. Amma “arılar”ın əsas komandasında oynamaq ona qismət olmayıb. “Hamburq”, “Kayzerslautern” və “Fortuna” macəralarının ardından 2016-da 4,7 milyon avroya “Hoffenhaym”a transfer olunan Kərəmin ulduzu məhz burda parlamağa başladı. Həm hücumameyilli, həm də müdafiəyəmeyilli yarımmüdafiəçi kimi oynamağı bacaran təcrübəli oyunçu 2019-da 32 milyon avroya “Bayer-04”ə transfer olundu və o vaxtdan bəri leverkuzenlilərin şərəfini qoruyurdu. Ötən mövsüm 36 rəsmi oyunda 5 qol, 3 məhsuldar ötürməlik performans sərgiləyən solaxay futbolçu Türkiyənin aşağı yaş qruplarından ibarət yığmalarında forma geysə də, sonradan Almaniya yığmasını seçdi. Bundestimin heyətində 2 oyun keçirib.

Yeri gəlmişkən, Kərəm Almaniyanı 2017-dən öncə seçdiyi üçün əslində Türkiyədə legioner sayılmalıydı. Amma federasiyanın yeni qərarından sonra o, yerli statusunda oynayacaq. Bilindiyi kimi, yeni mövsümdən etibarən klublara “mavi kart”a sahib olan maksimum 1 futbolçunu yerli statusda oynamağa icazə veriləcək. Söhbət Türkiyə vətəndaşlığı ola-ola, Türkiyə yığmasında oynamaq hüququ olmayan futbolçulardan gedir. Yəni Kərəmin oynadığı matçlarda “Qalatasaray” üçün legioner limiti “8+3”dən “9+2”yə çevriləcək.