“Fənərbaxça” Türkiyədə bu yay transfer dönəminin ən parlaq klubu sayılırdı.

"Football-plus.az" xəbər verir ki, amma son günlər baş verənlər onu göstərir ki, son çempion “Qalatasaray” belə desək, pusquda dayanmışdı və diqqəti üzərinə yönəltmək üçün sadəcə, lazımi zamani gözləyirdi. Həmin zaman artıq yetişib.

Zaha İstanbuldadı
Bir aydan artıqdı “Fənərbaxça”nın hədəfində olan və bu kluba keçəcəyi gözlənilən Uilfrid Zaha artıq “Qalatasaray”ın oyunçusudu! “Kristal Pelas”la müqavilə müddəti başa çatan və sərbəst oyunçuya çevrilən tanınmış vingerin ya “Fənər”ə qismət olacağı, ya da elə London klubunda qalacağı güman edilirdi. Amma “Qalatasaray”ın bir andaca araya girməsi vəziyyəti dəyişdi. “Cim-Bom”un 30 yaşlı futbolçuya olduqca cəlbedici təklif irəli sürməsi, komandanın ÇL-də oynaması amili və danışıqlara Didye Droqba kimi ulduzun qoşulması bu transferdə həlledici rol oynadı. Bazar günü axşam saatlarında “Aslan”ın Zaha ilə danışıqlara başladığını rəsmən açıqlaması və futbolçunun xüsusi təyyarə ilə İstanbula gəlməsi ilə “bomba” partlamış oldu. Özü də “Fənər”ə acıq vermək üçün “Qalatasaray”ın sosial şəbəkədəki səhifələri rəsmi açıqlama zamanı “ZAHAHA” ifadəsindən istifadə etdi. Kot d”İvuardan olan futbolçu, gözlənildiyi kimi, Atatürk Hava Limanında böyük izdihamla qarşılandı. Keçidin detallarına gəlincə, Türkiyə mətbuatının yazdığına görə, Zaha ilə 3 illik müqavilə imzalanacaq. Onun illik maaşı 5,5 milyon avro təşkil edəcək. Ən əsası azad agent statusunda gəldiyi üçün ulduz futbolçuya 6 milyon avro imza parası ödəniləcək! “Fənər”in son təklifi isə 5 milyon avro illik maaş və hər il 2 milyon avro imza parasına bərabər idi.

Qeyd edək ki, 1992-ci il təvəllüdlü futbolçu uzun illərdi “Kristal Pelas” kimi ortabab klubun şərəfini qorumasına baxmayaraq, futbol dünyasında yetərincə populyar simadı. Əsasən sol vinger mövqeyində qərarlaşan, amma hücumun istənilən bölgəsində oynamağı bacaran Zaha sürəti, driblinqi, top saxlamaq qabiliyyəti, cinah keçidləri və asmaları ilə tanınır. “Kristal Pelas”ın yetirməsi olan və peşəkar karyerasına 2010-cu ildə bu klubda başlayan Zaha o vaxtdan bəri yalnız 2013/14 mövsümünü fərqli klubda keçirib. 2013-cü ilə “Mançester Yunayted”ə transfer olunsa da, burda özünü göstərə bilməyib. Həmin mövsümün 2-ci dövrəsini icarə əsasında “Kardiff Siti”də keçirən Zaha 2014-də London klubuna qayıdıb və o vaxtdan bəri yalnız bu kollektivin şərəfini qoruyub. O, ötən mövsüm 28 rəsmi oyunda 7 qol, 3 məhsuldar ötürməlik performans sərgiləyib. Ümumilikdə Zaha indiyə qədər klub karyerasında 478 oyunda 91 qol, 77 məhsuldar ötürmə ilə fərqlənərək 168 qolun vurulmasında yaxından iştirak edib. Kot d”İvuar yığmasında isə 31 oyuna 5 qol vurub.

Bakambu və 2-ci qapıçı
“Qalatasaray”ın digər transferi Sedrik Bakambudu. Zaha qədər olmasa da, o da populyar forvardlardandı. Son mövsümü “Olimpiakos”da keçirən təcrübəli oyunçu əslində bir müddət öncə, daha dəqiq desək, iyunun 29-da BƏƏ təmsilçisi “Əl-Nəsr” ilə ikiillik müqavilə imzalamışdı. Hətta bu klubun düşərgəsində Niderlanda toplanışa da yollanmışdı. Amma “Qalatasaray”ın transfer sehrbazı Ərdən Timur 32 yaşlı oyunçunu Türkiyədə oynamağa razı sala bilib. Bakambu İstanbula birgünlük gecikmə ilə gəlməli olub. Cümə günü onu Niderlanddan gətirməli olan təyyarədə texniki problemlər yaranıb. Ailəsi ilə birlikdə təşvişə düşən Bakambu İstanbula şənbə günü axşam saatlarında gəlib. Tibbi müayinədən uğurla keçdikdən sonra isə bazar günü “Cim-Bom”la ikiillik müqavilə imzalayıb. “Sarı-qırmızılar” bu transferə görə “Əl-Nəsr”ə 700 min avro ödəyəcək. Futbolçunun özünə isə illik 1,5 milyon avro maaş veriləcək. Bu, Bakambunun Türkiyədə 2-ci macərası olacaq. Konqo DR-dən olan fransızəsilli oyunçunun ulduzu 2014/15-də Şenol Günəşin “Bursaspor”unda parlayıb. Həmin vaxt 8 qolla Türkiyə kubokunun bombardiri olan futbolçu “timsahlar”ın bu turnirdə finala qədər irəliləməsində böyük rol oynamışdı. Daha sonra İspaniyaya yollanaraq 7,5 milyon avroya transfer olunduğu “Vilyarreal”da adından söz etdirən Bakambu “Beytsin Qoyan”, “Marsel” və sonuncu dəfə “Olimpiakos”un şərəfini qoruyub. Əvvəlki klublarında olduğu kimi “94” nömrəli formanı seçən təcrübəli forvard ÇL-in 2-ci təsnifat mərhələsində “Jalgiris”ə qarşı oyunlarda iştirak etməyəcək. Onun növbəti mərhələdə iştirak ərizəsində olacağı gözlənilir.

Onu da bildirək ki, Okan Kocukla yollarını ayıran İstanbul nəhəngi 2-ci qapıçı mövqeyi üçün yeni transfer həyata keçirib. Belə ki, 2018-dən bəri “Qaziantep”in şərəfini qoruyan, ötən mövsümün 2-ci dövrəsini “Kasımpaşa”da keçirən Günay Güvənc heyətə cəlb olunub. Almaniyada doğulan və “Ştutqart Kikkers”in yetirməi olan Gunay 2013-16-cı illərdə “Beşiktaş”a məxsus olsa da, burda möhkəmlənə bilməyib. “Qaziantep”ə gələnə qədər o, “Adanaspor” və “Göztəpə”də də forma geyib. “Qalatasaray” Güvəncin əvəzinə anteplilərə 400 min avro ödəməklə yanaşı, 24 yaşlı qapıçı Batuhan Şəni də qarşı tərəfə göndərib. Maraqlıdı ki, Günay Güvənc ötən mövsüm “Qaziantep”in heyətində 22 superliqa matçında forma geyib və hesabına iki məhsuldar ötürmə yazıb!

İkardi nə vaxt gəlir?
Sonda “Qalatasaray”lıların yolunu böyük həsrətlə gözlədikləri Mauro İkardi ilə bağlı son xəbərləri də diqqətinizə çatdıraq. Zahanın İstanbula ayaq basdığı dəqiqələrdə İkardi ilə bağlı önəmli yeniliklər yaşandı. Belə ki, “Qalatasaray” bu transferi başa çatdırdı. Bunu məşhur insayder Fabrisio Romano da təsdiqlədi. Əslində argentinalının ailəsindəki problemlər olmasa, bu keçid daha öncə bitərdi. Amma bilindiyi kimi, İkardinin meneceri və həyat yoldaşı Vanda Naraya leykoz, yəni qan xərçəngi diaqnozu qoyulub. Yeni analizlərin cavabı dünən bəlli olmalıydı. İstanbul nəhəngi PSJ ilə 10 milyon avro qarşılığında anlaşıb. Bu məbləğ parislilərə 4 il ərzində ödəniləcək. İkardinin özü ilə üçillik anlaşma əldə olunub. Onun illik məvacibi 10 milyon avro təşkil edəcək. Bu pulun böyük hissəsi sponsorlar sayəsində ödəniləcək. Ötən mövsüm “99” nömrəli forma ilə oynayan 30 yaşlı hücumçuya bu dəfə “9” nömrə veriləcək. İkardinin İstanbulda böyük təmtəraqla qarşılanacağı gözlənilir. Onun 12 min yeni forması hazırlanıb. Bu formalar klubun rəsmi dükanlarında və internet üzərindən satışa çıxarılacaq. Eləcə də İkardinin transferi ilə bağlı möhtəşəm videoçarx hazırlanır. Qalır yalnız İkardinin İstanbula gələcəyi tarixin dəqiqləşməsi. Futbolçunun vəkili Elio Pinonun verdiyi məlumata görə, İkardi həftəsonuna qədər, yəni ən gec bazar günü – iyulun 30-da İstanbulda olacaq.