Bu transfer dönəmində çox fəal olan ''Fənərbaxça'' növbəti keçidini reallaşdırmağa yaxındı.

Belə ki, İstanbul nəhəngi ''Kalyari''nin oyun qurucusu Joao Pedro ilə anlaşıb. Bu transferi əzəli rəqib ''Qalatasaray''dan alınan qisas kimi də dəyərləndirmək olar. Bilindiyi kimi, mərkəz müdafiəçisi Əbdülkərim Bardakçı ''Fənərbaxça'' ilə anlaşa bilməyərək son anda ''Qalatasaray''a keçmişdi. Joao Pedro da Türkiyədə ən birinci ''Qalatasaray''ın gündəminə gələrək o klubla danışıqlara başlamışdı. Amma təcrübəli futbolçunun menecerinin böyük pullar tələb etməsi üzündən danışıqlar uğursuzluqla nəticələnmişdi. Bundan istifadə edən ''Fənər'' əvvəlcə Pedronun meneceri Marko Piççiolini srağagün İstanbula dəvət etdi və onunla anlaşmağı bacardı. Keçidin detallarına gəlincə, ''Fənərbaxça'' ''Kalyari''yə 1,5 milyon avrosu bonuslarla olmaqla ümumilikdə 6,5 milyon avro ödəyəcək. 30 yaşlı oyunçu ilə ən azı üçillik müqavilə imzalanacaq. Onun illik məvacibi isə 2,5 milyon avro təşkil edəcək. Tibbi müayinədən sonra rəsmi müqavilənin imzalanacağı gözlənilir. “Kalyari”nin baş məşqçisi Fabio Liverani dünən verdiyi açıqlamada kapitanın komandanı tərk etmək üzrə olduğunu təsdiqləyərək ona gələcək karyerasında uğurlar arzulayıb. Joao Pedro braziliyaəsilli italiyalı hucumameyilli yarımmüdafiəçidi. İtaliya yığmasında bir oyun keçirən Pedro ''Atletiko Mineyro''nun yetirməsidi. Daha öncə ''Penyarol'', ''Gimaraynş'', ''Santos'' və ''Eştoril''in şərəfini qoruyan Pedro 2014-dən bəri ''Kalyari''də çıxış edirdi. O ötən mövsüm 39 rəsmi oyunda 13 qol, 4 məhsuldar ötürməlik performans sərgiləyib.

Yeri gəlmişkən, Kim Min Çjenin ''Renn''ə transferində problem yaranıb. Ötən sayımızda koreyalı mərkəz müdafiəçisinin Fransa klubuna keçəcəyini və bu transferin 18 milyon avroya yekunlaşacağını xəbər vermişdik. Adı UEFA-ya göndərilən iştirak ərizəsinə salınmayan Kim artıq 4 gündü məşqlərə çıxmır. Amma məsələ burasındadı ki, Kalidu Kulibalini 40 milyon avroya ''Çelsi''yə satan ''Napoli'' Kimdən əl çəkmir. Neapollular futbolçunun ''Renn''lə anlaşdığını bilən kimi ''Fənərbaxça''ya nəğd 21 milyon avro təklif etdilər! ''Renn'' isə məbləği 19,5 milyon avroya yüksəltməli oldu. Amma italyanlar yenə də bir addım öndədi. Çünki ''Renn'' məbləği nəğd yox, hissə-hissə ödəməyi təklif edib. Hələ ki, bu iki klub arasında 25 yaşlı futbolçu uğrunda amansız mübarizə davam edir. ''Fənər'' pulu nəğd tələb edir və düşünmək üçün fransızlara vaxt verib.

ƏLİ