Mateo Retegi tarixi vətənində oynayacaq. Son bir ildə “Tiqre”də çıxış edən hücumçu İtaliyaya yollanıb.

"Football-plus.az" xəbər verir ki, o, yeni mövsümə “Cenoa”da başlayacaq. Genuya klubu onun məxsus olduğu “Boka Xuniors”a 16 milyon avro ödəyib.

Qeyd edək ki, Argentinanın San Fernando şəhərində doğulan Mateonun anasının atası italiyalıdı. O, bu səbəbdən İtaliya vətəndaşlığını alıb və hazırda bu ölkənin milli komandasında çıxış edir. Retegi martın 23-də AÇ-2024-ün seçmə turnirinin İngiltərə ilə oyununda (1:2) “skuadra adzurra”da debüt edib. Onun həmin matçda qol vurduğunu da qeyd edək. 24 yaşlı Mateo milli formada meydana çıxdığı 3 oyunda 2 qolun müəllifi olub.

Qeyd edək ki, 2018-ci ildən “Boka Xuniors”a məxsus olan futbolçu Argentina nəhənginin formasını ölkə çempionatının yalnız bir oyununda geyib. İcarə əsasında “Estudiantes”, “Talyeres de Kordoba” və “Tiqre”də çıxış edən Mateo klub səviyyəsində meydana çıxdığı 161 oyunda 47 qolun və 8 məhsuldar ötürmənin müəllifi olub.