İtaliya yığmasının AÇ-2024-ün seçmə turnirinin ilk oyunlarında hər mənada yeni futbolçu diqqəti cəlb etdi.

“Football-plus.az” xəbər verir ki, Mateo Retegi onu “skuadra adzurra”ya dəvət edən Roberto Mançininin ümidlərini doğrultdu. Gənc hücumçu debütdəcə əbəs yerə start heyətində oynamaq şansı qazanmadığını da sübut etdi.

Uğurlu debüt
İtaliya millisi seçmə mərhələnin ilk oyunları ərəfəsində aparıcı hücumçu Çiro İmmobilenin xidmətindən zədə üzündən məhrum olmuşdu. Komandanın digər forvardlarının hazırkı forması da ürəkaçan deyildi. Baş məşqçi bunu nəzərə alaraq Retegiyə dəvət göndərmək qərarına gəlmişdi. 23 yaşlı futbolçu son vaxtlar Argentinada özünü bombardir kimi göstərmişdi. “Tiqre”nin əsas qol silahı sayılan Mateonun Avropada debütü əlamətdar alındı: o, İngiltərə ilə matçda göy futbolkada qol hesabını açdı. İtaliya Neapolda britaniyalılara uduzsa (1:2) da, Retegi debütünə görə özü ilə qürurlana bilər. O, Malta ilə növbəti seçmə oyunda (2:0) da qapya yol tapdı. Başqa sözlə, 2 oyuna 2 qol.

Retegi kimdi?
Haqqında danışdığımız bu oğlan argentinalıdı. Amma İtaliya pasportuna malikdi. Mançini məhz bu səbəbdən onu milli komandaya çağırmaqda heç bir problem yaşamayıb. Məlumunuz olsun ki, 1999-cu il aprelin 29-da San Fernando şəhərində doğulan Mateonun anasının atası Ancelo Dimarko vaxtilə İtaliyanın Siciliya vilayətinin Kanikatti qəsəbəsində yaşayıb. Onun ailəsi sonradan Cənubi Amerikaya köçüb.

Retegi futbolun sirlərini “River Pleyt”də öyrənməyə başlasa da, 17 yaşında əzəli rəqib “Boka Xuniors”un sıralarına keçib. Amma “Boka”da özünü göstərmək şansı olmayıb: əsasını genuyalıların qoyduğu komandada 2018/19 mövsümündə yalnız bir oyun keçirib. Buenos Ayres klubu 2019-cu ildən başlayaraq onu növbə ilə “Estudiantes”, “Talyeres de Kordoba” və “Tiqre”yə icarəyə verib. Hücumçu qolçuluq bacarığını məhz hazırkı komandasında nümayiş etdirə bilib.

O, son ilyarım ərzində san fernandoluların əsas qol ümidi sayılır. 2022-ci il mövsümündə bütün turnirlərdə meydana çıxdığı 42 matçda 23 qolun və 3 məhsuldar ötürmənin müəllifi olub. Konkret olaraq Argentina çempionatını nəzərə alsaq, “Tiqre”yə 27 oyunda 22 qol və 2 məhsuldar ötürmə ilə fayda verib. Bu il ölkə çempionatında 8 oyuna 6 qol vurub və hazırda bombardirlərin siyahısında liderdi. Onun cari mövsümdə bütün matçlarda start heyətində meydana çıxdığını və final fitinə qədər oynadığını da qeyd edək.

Ona böyük ümidlər bəslənilir
Mançini uğurlu debütündən sonra onun haqqında bu fikri səsləndirib: “Retegi mənə bir qədər Batistutanı xatırladır”.

Yığmanın yarımmüdafiəçisi Marko Verratti isə İngiltərə ilə matçdan əvvəl yeni oyundaşının əməksevərliliyini qabardıb: “Onunla birlikdə yalnız iki gün məşq etmişik. Mateo artıq özü ilə bağlı xoş təəssüratlar oyada bilib. Fiziki hazırlığı əladı, bizə kömək etməyə qadir olduğunu böyük həvəslə göstərmək istəyir. Komanda yoldaşları ilə daha yaxından tanış olması üçün müəyyən vaxta ehtiyacı olacaq. Amma indidən uyğunlaşma prosesinin qısa sürəcəyini deyə bilərəm”.

Reteginin “skuadra adzurra”ya İmmobilenin zədələnməsinə görə dəvət alması o qədər də əhəmiyyətli səbəb deyil. “Gazzetta dello Sport”un məlumatına görə, baş məşqçi ilk məşqdəcə hücum xəttində argentinalını Domeniko Berardi və Lorentso Pelleqrini ilə birgə oynatmaq qərarına gəlib. Komandanın İngiltərə ilə matçda üç hücumçulu sxemlə oynaması buna sübutdu.

Yeri gəlmişkən, Mateo tezliklə A seriyasında görünə bilər. “Milan”, “İnter” və “Roma” onunla ciddi maraqlanır. Qışda isə “Udineze” onu sıralarına qatmaq istəyib, amma gənc futbolçu bu klubda oynamağa razılaşmayıb. Atası El Çapa oğlunun bir çox klubların maraq dairəsində olduğunu deyir: “İtaliya, İspaniya, Almaniya və hətta İngiltərədə ona maraq var. Avropada oynamaq Mateonun ən böyük arzusudu”.

“Skuadra adzurra”da 23-cü argentinalı
Ümumiyyətlə, İtaliya yığmasına Argentinadan oyunçu cəlb etmək uzun illərin davam edən ənənəsidi. Artıq Retegi “skuadra adzurra”nın tarixinə 23-cü argentinalı kimi düşüb. Bu yerdə onun bəzi sələflərini yada salmaq da maraqlı olar.
* İtaliya millisində oynamış əvvəlki argentinalı Franko Vaskesdi. Onu komandaya 2015-ci ildə Antonio Konte dəvət etmişdi. Sabiq baş məqşçi Frankonu yalnız İngiltərə və Portuqaliya ilə yoldaşlıq matçlarında sınamışdı. Bundan sonra dəvət almadığı üçün 2018-ci ildə milli formasını dəyişməli oldu. Onda Argentina yığması heç cür titulsuzluğa son qoya bilmirdi. Amma indi vəziyyət köklü surətdə dəyişib. Vaskes bir neçə il əvvəl gələcək Avropa çempionundan gələcək dünya çempionunun sıralarına keçdi. Doğrudu, yarımmüdafiəçinin heç bir komanda ilə titul qazanmaq şansı olmadı. Argentina yığmasında yalnız 3 yoldaşlıq matçı keçirən Franko indi 34 yaşındadı.
* İtaliya yığmasında oynamış ən məşhur argentinalılardan biri Mauro Kamoranezidi. O, bu komandada 2003-10-cu illərdə çıxış edib və DÇ-2006-nın qalibi olub. İndi 46 yaşında olan sabiq yarımmüdafiəçi göy formada meydana çıxdığı 55 oyunda 4 qol vurub.
* Daha uzağa boylansaq, təbii ki, əfsanəvi Omar Sivori, Raymundo Orsi və Luis Montini də xatırlamalıyıq. Maraqlıdı ki, onlar həm Argentinanın, həm də İtaliyanın əsas komandasında çıxış ediblər. Orsi ilə Monti “skuadra adzurra”nın formasında DÇ-1934-ün qalibi olublar. Həmin mundialda uğur qazanan argentinalılardan Enrike Quayta ilə Attilio Demariyanın da adını çəkməliyik.
* Avropa komandasında yalnız bir oyun keçirən oyunçular da olub. Esekyel Skelotto (2012-ci ildə İngiltərəyə qarşı), Kristian Ledesma (2010-cu ildə Rumıniyaya qarşı), Bruno Pesaola (1957-ci ildə Portuqaliyaya qarşı), Rinaldo Martino (1949-cu ildə İngiltərəyə qarşı), Alexandro Skopelli (1935-ci ildə Fransaya qarşı) və Euxenio Mossonun (1914-cü ildə İsveçə qarşı) debütü ilə son matçı bir olub. Maraq üçün Mossonun “skuadra adzurra”nın tarixinə ilk argentinalı kimi düşdüyünü də bildirək.