2-ci tur maraqlı və qeyri-adi hadisələr ilə zəngin oldu.

"Football-plus.az" xəbər verir ki, samaradakı “qol yağışı” zamanı “Krılya Sovetov” xarakter nümayiş etdirərək “Dinamo” ilə oyunda 2 topluq fərqi aradan qaldırmağa müvəffəq oldu. Son illərin dəyişməz çempionu “Zenit” mövsümdə ilk xallarını itirdi. Kassyerranın mövsümdəki 3-cü qolu Sergey Semakın komandasını hesabda önə keçirsə də, son anlarda müdafiəyə yardım etməyə gələn Mostovoy penaltiyə səbəbkar olaraq antiqəhrəmana çevrildi. Komliçenko yekun nəticəni məyyənləşdirərək “Rostov”u məğlubiyyətdən xilas etdi. Semak isə final fitindən sonra qırmızı vərəqə aldı.

Öz meydanında “Soçi”ni asanlıqla məğlub edən “Krasnodar” hələ ki itkisiz irəliləyir. Ümumiyyətlə, “öküzlər” bu təqvim ilində premyer-liqa çərçivəsində evdə keçirdikləri 8 oyunun heç birində uduzmayıblar (5 qələbə, 3 heç-heçə). “Lokomotiv” səfərdə “Fakel”i darmadağın edərək mövsümdə ilk qələbəsini qazandı. Dubl edən sol müdafiəçi Tiknizyan son dönəmlərdə inanılmaz məhsuldarlıq nümayiş etdirir. O, XXI əsrdə Rusiya çempionatında ardıcıl 4 oyunda fərqlənməyi bacaran ilk müdafiəçi oldu. 24 yaşlı futbolçu yığma və klub karyerasında keçirdiyi son 7 rəsmi oyunun 6-da fərqlənməyi bacarıb.

Nəinki turun, bəlkə də mövsümün ən unudulmaz və qalmaqallı oyunu Qroznıda keçirildi. Çempionluğa iddialılardan olan ÇSKA ilk turda Yekaterinburqdan xalsız ayrıldığına görə bu dəfə mütləq qalib gəlmək istəyirdi. Artıq 13-cü dəqiqədə “Axmat” azlıqda qaldı və penaltini Çalov dəqiq yerinə yetirdi. Bu, “penalti seriyası”nın başlanğıcı idi. Hakim Vladislav Bezborodov ilk yarının qalan vaxtında daha 3 penalti təyin etdi! Konate və Çalovun dəqiq zərbələrindən sonra hesab 2:1 qonaqların xeyrinə oldu. İlk yarının son anlarında isə çox qalmaqallı və böyük müzakirələrə səbəb olan bir epizod yaşandı. Qonaqların heyətində Qayiçin kobudluğundan sonra Bezborodov “nöqtə”ni göstərdi. Qaydanı pozan oyunçuya sarı vərəqə göstərildi. Oleynikovun zərbəsini Akinfeyev dəf etdi! Bura qədər hər şey normaldı. Amma Akinfeyev zərbəni dəf etdikdən sonra hakim oyunu saxlayıb (!) monitora baxmağa getdi. Sən demə, VAR-dan göstəriş gəlibmiş ki, Qayiçə “son ümid folu”na görə sarı yox, qırmızı vərəqə göstərilməlidi. Bezborodov da məhz belə etdi və ən əsası zərbəni təkrar etdirdi! Bu, açıq-aşkar VAR qaydalarının pozulması deməkdi. Bu dəfə Konate dəqiq oynadı və tərəflər fasiləyə 2:2-lik bərabərliklə yollandı. Bu cür oyunda yekun nəticə, təbii ki, ancaq penalti ilə müəyyənləşə bilərdi. Matçın sonlarına yaxın Bezborodov 5-ci dəfə “nöqtə”ni göstərdi və Çalov het-trik edərək komandasına qələbə qazandırdı. Müstəqil Rusiya çempionatında buna qədər yalnız bir dəfə - 1999-cu ildə “Rotor” - “Çernomorets” oyununda 5 penalti təyin olunmuşdu. Həmin vaxt 5 zərbədən 2-si qeyri-dəqiq alınmışdı. Ümumiyyətlə, Bezborodov ötən mövsümün startından bəri artıq 17 penalti verib və bu müddətdə ən yaxın izləyicisindən 8 penalti çox təyin edib. Rusiya çempionatında buna qədər yalnız bir dəfə bir futbolçunun bir oyunda penaltidən 3 qol vurmasına rast gəlinmişdi. Bu het-trikin müəllifi 2017-ci ildə “Tom”la oyunda “Anji”li Arsen Xubulov olmuşdu. Sizcə, həmin oyunu kim idarə etmişdi? Təbii ki, Bezborodov...