Xorvatiyalı ulduz “Beşiktaş”ı seçdi
Nəhayət, “Beşiktaş”da önəmli bir transferlə fanatlarını sevindirdi.
"Football-plus.az" xəbər verir ki, bu yay transfer dönəmində açıq-aşkar “Fənərbaxça” ilə “Qalatasaray”ın kölgəsində qalan və fanatları tərəfindən təniqd atəşinə tutulan “Qartal” neçə müddətdi danışıq apardığı Ante Rebiçi İstanbula gətirdi.Tanınmış xorvatiyalı futbolçu bazar günü İstanbula ayaq basdı. Düzdü, Rebiç Zaha və ya İkardi kimi böyük təmtəraqla qarşılanmadı. Amma onu qarşılamaq üçün də hava limanına 50-yə yaxın azarkeş gəldi. 29 yaşlı futbolçu türkiyəli həmkarlarımıza ilk açıqlamasında bunları dedi:
“Burda olduğum üçün sevincliyəm. Ən qısa müddətdə yeni komanda yoldaşlarım və baş məşqçi Şenol Günəş ilə tanış olmaq istəyirəm. Gəlməmiş Domaqoy Vida ilə məsləhətləşdim. “Beşiktaş” barədə mənə yalnız xoş sözlər dedi. Hər şey qaydasındadı. “7” nömrəli formanı seçmişəm”.
Xorvatiyalı ulduz tibbi müayinədən keçdikdən sonra ikiillik müqaviləyə imza atıb. Onun illik qazancı 2,5 milyon avro təşkil edəcək. Bu transfer “Beşiktaş”a yalnız 1,5 milyon avroya başa gəlib. Üstəlik bu məbləğin 1 milyon avrosu bonuslarla nəzərdə tutulub. Yəni nəğd şəkildə klubun büdcəsindən yalnız 500 min avro çıxıb. Qeyd edək ki, Rebiç “Slpit”in yetirməsidi və peşəkar karyerasına da bu klubda başlayıb. Sonrakı illərdə “Fiorentina”, “Leyptsiq”, “Verona” və Frankfurt “Ayntraxt”ının şərəfini qoruyub. 2019-da bəri isə “Milan”ın uğurları üçün tər tökürdü. Hücumun istənilən mövqeyində oynamağı bacaran universal futbolçu İtaliya nəhəngində keçirdiyi 4 mövsüm ərzində 123 rəsmi oyunda 29 qol, 17 məhsuldar ötürməlik performans sərgiləyib. Xorvatiya yığmasında isə indiyə qədər 42 oyuna 3 qol vurub.
