“Antverp”: 66 illik həsrətin sonu!
Nəhayət, 2022/23 mövsümündə Belçika çempionatında, belə ifadə etsək, “Brügge”nin hökmranlığı sona çatdı. Jüpile liqada ardıcıl 3, əvvəlki 5 mövsümdə isə 4 dəfə çempion olan komanda bu dəfə ən yüksək titul uğrunda yarışa bilmədi. Brüggelilərin zəif çıxışı birdən-birə üç komandanın çempionluq yarışına qoşulmasına şərait yaratdı. Və qızıl medalların sahibi son turda - olduqca dramatik mübarizə şəraitində müəyyənləşdi.
“Brügge” “Yunion”u yenə tituldan etdi
2021/22 mövsümündə Alfred Sxroyderlə 18-ci dəfə çempion olan “Brügge” yeni mövsümə Karl Hofkensin başçılığı altında start verdi. İlk turlar komanda üçün çox çətin keçdi. Artıq müntəzəm çempionatın ilk dövrəsində brüggelilərin titulu qoruya bilməyəcəyi böyük ölçüdə məlum idi. Və rəhbərlik 2022-ci ilin dekabrında 44 yaşlı Hofkens ilə yolları ayırmağa məcbur oldu.
“Brügge” əvvəlki mövsümün finişi ərəfəsində “Yunion”un titul qazanmaq arzusunun üstündən xətt çəkmişdi. Ölkə nəhəngi bu dəfə bu rəqibə daha dramatik şəkildə zərbə vurdu. “Yunion”çempionatin həlledici mərhələsi sayılan mükafatlar uğrunda mübarizənin son turunun çempionla ev oyununun 46-89-cu dəqiqələri aralığında qızıl medalların sahibi idi. 89-cu dəqiqədə hesabın bərabərləşməsi (1:1) san jillualıları 2-ci yerə saldı. “Brügge”nin 90+3-cü dəqiqədə hesabda önə keçməsi isə “Yunion”u daha bir pillə geri saldı. Mövsümü boşa verən brüggelilər 3:1 hesablı qələbə ilə şəhərciyi təmsil edən komandanın azsaylı azarkeşlərini növbəti dəfə məyus etdilər. Xüsusi vurğulayaq ki, “Brügge” çempionluq qrupunda titula iddia etməyən yeganə komanda idi: bu qrupda mübarizəyə 4-cü yerdə başladı və mövsümü bu yerdə də başa vurdu. Amma, necə deyərlər, sonda qapını bərk çırpmaq üçün əlindən gələni etdi.
“Yunion”un baş məşqçisi Karel Gerarts əvvəlki mövsümlə müqayisədə daha ağır zərbə aldıqlarını deyir: “Son matçda oyuna nəzarət edir, demək olar ki, rəqibə heç bir şans vermirdik. Komandamı yalnız ikinci qolu vura bilməməsinə görə qınamaq olar. Amma indi titulun əlimizdən çıxmasına görə kimisə günahlandırmağın zamanı deyil...”
“Genk” çempionluğa çox yaxın idi
“Brügge” “Yunion”la oyunun 89-cu dəqiqəsində hesabı bərabərləşdirərkən “Genk” liderliyə yüksəldi. Amma “Antverp” ilə ev oyununun əsas vaxtına əlavə olunan 4-cü dəqiqədə Tobi Alderveyreldin zərbəsindən sonra qapısında qol gördü. 2:2 hesabı çempionluğa çox yaxın olan genklilərin mövsümü 2-ci yerdə başa vurmasını qaçılmaz etdi. Halbuki Vauter Vrankenin çalışdırdığı komanda çempionatın birinci mərhələsini “Yunion”u topların daha yaxşı fərqinə əsasən qabaqlamaqla 1-ci yerdə bitirmişdi. Əvvəlki mövsümdə 8-ci yeri tutaraq avrokuboklardan kənarda qalan “Genk” bu dəfə sona qədər mübarizə apardı. Titul qazanılmasa da, 2-ci yerin sahibi kimi Çempionlar Liqasında oynamaq hüququ qazanması genklilərin böyük yüksəlişindən xəbər verdi.
44 yaşlı Vrankenin bununla bağlı fikirləri belədi: “Birgə işimizin ilk gününə qayıtsaq, mövsüm ərəfəsindəki itkilərimizi xatırlasaq, bizi titildan bir neçə dəqiqəin ayırması faktı düşündürücüdü. Futbolçularımız mövsümboyu imkanlarından maksimum dərəcədə istifadə etdilər. Həm məşqlərdə, həm də matçlarda çox yaxşı təsir bağışladılar. Biz çempionluq kubokuna layiq idik. Təəssüf ki, rəqibin bir dəqiq zərbəsi bütün zəhmətimizin üstündən xətt çəkdi...”
1957-ci ildən sonra ilk dəfə!
İndi isə jüpile liqanın qalibi haqda mülahizə yürüdək. Əslində “Antverp” çempionluq şansına görə “Genk” və “Yunion”dan geridə idi. Amma artıq məlum olduğu kimi, son turda baş verən dramatik məqamlar məhz bu komandanın azarkeşlərini sevindirdi. Özü də uzun müddətdən sonra. Bəli, antverpenlilər 1957-ci ildən sonra ilk dəfə Belçika çempionu oldular!
Ümumiyyətlə, komanda üçün son mövsüm ikiqat uğurlu alındı. “Qırmızı-ağlar” hələ mövsümün gedişində - aprelin 30-da keçirilən finalda “Mexelen”i məğlub etməklə (2:0) ölkə kubokunu qazanmışdı.
Başqa sözlə, Mark van Bommel komandaya tarixində ilk dəfə “qızıl dubl” qazandırdı! Baş məşqçi vəzifəsinə 2022-ci ilin mayında təyinat alan niderlandlı mütəxəssis bundan yaxşı debüt arzulaya bilməzdi. Daha əvvəl ölkəsində PSV-ni və Almaniyada “Volfsburq”u çalışdıran 46 yaşlı sabiq yarımmüdafiəçi məşqçi kimi ilk böyük uğurlarını qazandı. Çoxdan arzulanan çempionluğun rəsmiləşməsinin ertəsi günü mövsümün ən yaxşı məşqçisi seçilən Van Bommelin “qızıl dubl”la bağlı fikirləri təvazökarlğından xəbər verir:
“Kuboklar heç də məşqçinin səviyyəsini 100 faiz xarakterizə etmir. Mən karyeramda yalnız ikinci tam mövsümü başa vurmuşam. Bəli, yaxşı məşqçi olduğumu göstərmək istəyirəm. Amma bu fikir heç də yalnız titullarla təsdiqlənmir”.
Futbolçular baş məqşçi ilə işləməkdən çox məmnundular. Komandanın aparıcı hücumçusu Vinsent Yansseni dinləyək:
“Məsələ heç də oyun üslubu və ya taktika ilə bağlı deyil. Böyük uğurumuzda məşqçimizin hamıyla xoş rəftar etməsinin də rolu var. O, daim bütün oyunçularla ünsiyyətdə olur, bizi hər həftə oyunlara psixoloji cəhətdən də hazırlayır. Van Bommel bu keyfiyyətləri ilə də möhkəm komanda olmağımızda rol oynayıb”.
Müdafiəçi Riçi de Lat isə bu fikirdədi:
“Fikrimcə, uğurumuzda komanda ilə məşqçinin payı yarıbayarıdı. O, bizə lazım gələndə ailəmizlə birgə olmaq imkanı yaradır. Bizi həmişə lazımi məqamlara kökləməyi yaxşı bacarır ”.
Digər xəbərlər
