Nazir “boykot” dedi, Zvonaryova Polşaya buraxılmadı
Dünən Varşavada WTA seriyalı tennis turniri start götürüb.
"Football-plus.az" xəbər verir ki, Polşanın idman naziri Kamil Bortniçuk turnir ərəfəsində dünyanın 1-ci raketkası – həmvətəni İqa Sventekin Rusiya və Belarus təmsilçiləri ilə oyunlarına baş çəkməyəcəyini elan edib. Nazir həmçinin bildirib ki, WTA və ATP kimi qurumların Rusiya və Belarusdan olan tenniçsilərə münasibətdə siyasətindən razı deyil. Baxmayaraq ki, bu iki ölkənin təmsilçiləri turnirlərdə milli rəmzlərsiz iştirak edir:
“İstərdim ki, Sventek finala çıxsın və Varşava turnirini qazansın. Onun oyunlarını izləməkdən şad olacam. Bununla belə istərdim ki, rusiyalı və belaruslu tennisçilərlə oynamalı olmasın. Belə hadisə baş versə, təəssüf ki, həmin oyunlarda iştirak etməyəcəm”.
Bildiyiniz kimi, Sventek ötən ilin aprelindən bəri, yəni artıq 68 həftədi WTA reytinqinə başçılıq edir. İyulun 30-na qədər davam edəcək turnirin iştirakçıları sırasına Rusiyadan Vera Zvonaryova, Belarusdan isə Aleksandra Sosnoviç salınıb. Ancaq Vera Polşaya buraxılmayıb. Bu haqda xəbəri “RİA Novosti” agentliyi Polşanın Daxili İşlər Nazirliyinə istinadla yayıb. Xəbərdə bildirilir ki, sərhədçilər Zvonaryovanın Polşa ərazisinə daxil olmasına imkan verməyib. Ona görə ki, tennisçinin adı “Polşa Respublikasının ərazisini daxil olması arzulanmayan şəxslərin” siyahısındadı. Vera Varşavaya Belqraddan, Fransanın verdiyi viza əsasında gəlirmiş. Polşanın DİN-i bəyan edib ki, bir müddət Varşava hava limanının tranzit zonasında qalan tenniçsi ardından ölkə ərazisindən çıxarılıb.
Bu arada Qadınların Tennis Assosiasiyası (WTA) da 38 yaşlı Zvonaryovanın Polşaya buraxılmamasına münasibət bildirib:
“WTA Vera Zvonaryovanın Varşavada üzləşdiyi hadisədən xəbərdardı. Bütün oyunçuların təhlükəsizliyi və rahatlığı WTA üçün əsas prioritetdi. Vera Polşanı tərk edib və biz bu məsələni öyrənəcəyik”.
Digər xəbərlər
