İndidən açıq-aşkar deyə bilərik ki, mövsümün transfer həmləsini “Neftçi” etdi.

Ağ-qaralar” əsas rəqibinin vitse-kapitanı Qara Qarayevi “rənglərinə bağlıdı”. Yarımmüdafiəçi karyerası ərzində ancaq Ağdam təmsilçisində çıxış etmişdi. Nə az, nə çox - düz 18 il bir klubda çıxış etmək asan iş deyil. Qara Qarayev nədən “köhlən atlar”dan ayrılmaq qərarı verdi? Bunu izah etməyə çalışacam.

1. Oynamaq istəyi
2022/23 mövsümündə yarımmüdafiəçi “Qarabağ”ın heyətində az-az meydana çıxırdı. O, rəqabətdə Julio Romao ilə Riçard Almeydaya uduzurdu. Nihad Quliyevin dönüşü, Patrik Andradenin transferi 30 yaşlı futbolçunu düşünməyə vadar etdi. Burda rəqabət aparmaq çox çətin idi. “Neftçi”də isə Qaranın işi daha asan olacaq. Bu üzdən də “Qarabağ”ı tərk etməyə qərar verdi.

2. Maliyyə məsələsi
Mediada yazılanlara inansaq, çox oynamadığı üçün Qaranın maaşı azaldılıb. Yenidən formalaşdırılan “Neftçi” yarımmüdafiəçinin istədiyi maaşı verdi. Həm oynamaq ehtimalı, həm də yüksək qazanc onun getməsinə səbəb oldu.

3. Diqqətsizlik
Düşünürəm ki, ən vacib məsələ budu. Məhz bu məqama xüsusi diqqət ayıracam. Qara “Qarabağ”ın əfsanəsi olmağa doğru addım-addım irəliləyirdi. Yuxarıda qeyd olunan məqamlar yarımmüdafiəçi üçün vacib idi? Əlbəttə ki, yox. Çünki Qara 2 il öncə UEFA-ya verdiyi müsahibədə “Qarabağ”ın onu istəməyəcəyi təqdirdə “köhlən atlar”da məşqçi işləməyə başlayacağını bildirmişdi. Adam 2 il ərzində dəyişə bilər? Əlbəttə ki, yox! Söhbət Qara Qarayevdən gedirsə, bu haqda düşünməyə belə dəyməz. Bəs nə üçün Qara “Neftçi”yə getdi? Düşünmək olar ki, yarımmüdafiəçi baş verən proseslərə görə incidi. Özü də baş məşqçi Qurban Qurbanovdan və məşqçilər heyətindən. Çünki sosial şəbəkələrdəki vida mesajına baxsaq, orda klubun bütün üzvləri ilə şəklini paylaşıb. Ancaq məşqçilər heyəti ilə birgə fotosu yoxdu. Qara niyə inciyə bilər? Bunun sadə cavabı var. Qurban Qurbanov futbolçunun əsas heyətdə oynaya bilməyəcəyini deyib. Bundan sonra Patrik Andradenin də komandaya qaytarılması Qaranın küsməsinə səbəb ola bilər. Bunlar, sadəcə, ehtimallardı. Həqiqətin necə olduğunu bir gün ya Qara Qarayev, ya da Qurban Qurbanov açıqlayacaq. Lakin yarımmüdiəçinin əzəli rəqibə keçidi çox şeydən xəbər verir. Bu hadisə məni bir qədər keçmişə apardı. 2021-ci ilin yayında Andrea Pirlo “Milan”la yeni müqavilə bağlamadı. Həmin dövrdə “qırmızı-qaralar”ın baş məşqçi Alleqri düşündü ki, yarımmüdafiəçi qocalıb. Həm də maaşı yüksək olduğundan Pirlo ilə yollar ayrıldı. İtaliyalı futbol əfsanəsi də əzəli rəqiblərdən “Yuventus”a keçdi. Həmin “qoca” ardıcıl 4 mövsüm “ağ-qaralar”ın heyətində İtaliya A seriyasının qalibi oldu.

Qaranın 30 yaşı var. “Qarabağ”ın bir çox azarkeşi düşünür ki, yarımmüdafiəçi Ağdam təmsilçisi üçün qocadı. Millimizin üzvü də “ağ-qaralar”a keçdi. “Neftçi”nin heyətində ardıcıl çempionluqlar qazansa, təəccüblənməyə dəyməz. Çünki futbol bir oyundu. Onun belə maraqlı sürprizləri olur...

İLKİN SULTANLI