Belə görünür, “Linkoln”la səfər oyununun uzatma dəqiqələrində Benzyaya verdiyi ötürmə Qara Qarayevin “Qarabağ” formasında sonuncu məhsuldar hərəkəti imiş. Komanda vətənə döndü və günlərdi haqqında danışılan ayrılıq reallaşdı: Qara “atdan düşdü”, deyilənə görə, yaxın günlərdə ağ-qara formanı geyməyə başlayacaq.

Bu ayrılıq və mümkün transfer ilə bağlı o qədər çox sual var ki, sıralasam, oxucu labirintə düşəcək və fikri qarışacaq. Qaranı yerindən oynadan puldu, yoxsa start heyətində yer almaq arzusu? Julio Romao və Patrik Andrade ilə rəqabət aparmaq reallığı bu qədər qorxuludu? Ortada “Sabah” da varsa, niyə məhz “Qarabağ”ın əsas rəqibinə yollanır? Adrian Mutu onu harda gördü və bəyəndi? Çox güman, bütün bu suallara tezliklə aydınlıq gələcək.

Amma Qaranın gedişini özəlləşdirən, buna əlahiddə hadisə kimi baxmağa vadar edən bir əsas məqam var ki, hər kəs bunun fərqindədi. Bir klub sisteminin içində böyüyən, boya-başa çatan futbolçunun 15 ildən sonra iş yerini dəyişməsi – həm də yetərincə müəmmalı şəraitdə - həmişə ağrılıdı. İstər Qara, istər onu öz övladı kimi görən “Qarabağ”, istərsə də bu komandanın dünənə qədər adı çəkilən futbolçuya səcdə edən azarkeşləri indi narahat düşüncələr içindədi. Bəlkə də futbolçu narahat deyil. Açıq danışaq da: Azərbaycanda kluba sədaqət, vəfa anlayışları hələ o qədər kök salmayıb ki, hansısa futbolçu bunları qəlbinə yaxın qəbul etsin, ürəyinə salsın, məsələyə yalnız bu prizmadan yanaşsın. Biz indiyə qədər də dəfələrlə “Neftçi” ilə “Qarabağ” arasındakı keçidləri görmüşük. Sirr deyil ki, 5 manat artıq verən kimi azərbaycanlı futbolçular üçün bütün kluba sadiqlik idilliyası bitir. Məncə, Qara da bu tendensiyadan kənarda deyil.

Hə, bu ayrılıqda diqqətimi cəlb edən əsas məqam Qaranın start heyətində yer almaq arzusudu. Üç aydan sonra 31 yaşını tamamlayacaq birisi ölkənin ən köklü klubundan bununla bağlı təminat alıbsa, afərin! Amma “Qarabağ”ı yalnız daha çox pul qazanmaq naminə “Neftçi”yə dəyişirsə, bu məsələdə start heyətində yer almaqla ehtiyatda qalmağın onun üçün heç bir fərqi yoxdusa, bu artıq başqa məsələdi. İstənilən halda, Qaranın ölkə futbolundakı statusu dəyişdi: bizim gözümüzdə artıq 15 il “Qarabağ” sistemində yetişən, bu camiədə özünəməxsus yeri olan birisi yox, ağ-qara Qaraya çevrildi. Adi Qaradan ağ-qara Qaraya transformasiya olunmaq yolunda son addımı atmaq qalır ki, onu da bu gün-sabah görəcəyik. Mübarəkdi!

ORXAN