Dünən “Neftçi” Qara Qarayevin transferini açıqladı.

“Football-plus.az” xəbər verir ki, millimizin üzvü flaqmanla “2+1” il şərti ilə müqavilə imzaladı.

Mediada bu keçidlə bağlı söz-söhbətlər gəzir. Bir çoxları qeyd edir ki, yarımmüdafiəçi ona qarşı hörmətsizlik olunduğunu əsas gətirərək “köhlən atlar”dan ayrılıb. Redaksiyamıza bununla bağlı informasiya daxil olub. Qara Qarayev özü komandadan ayrılmaq istəyib. Futbolçu əsas həyətə düşməyə çətinlik çəkəcəyini anlayıb. Bu səbəbdən də 2022/23 mövsümünün sonundan özünə yeni iş yeri axtarıb. Düzdü, yarımmüdafiəçi ilə “Sabah” da maraqlanıb. “Bayquşlar”ın baş məşqçisi Murad Musayev onu sərəncamında görmək istəyib. Lakin oyunçu milli komandadan olan dostu Emin Mahmudovun dəvətini də dəyərləndirərək “Neftçi”yə keçib.

Bu məsələnin görünən tərəfidi. Lakin Qaranın seçimində əsas rolu maliyyə şərtləri oynayıb. “Ağ-qaralar” “bayquşlar”dan daha çox maaş təklif etdiyi üçün Qara flaqmanı seçib.

Əslində yarımmüdafiəçinin “köhlən atlar”la 1 illik müqaviləsi qüvvədə idi. Sadəcə, ağdamlılar klubdakı xidmətlərini nəzərə alaraq Qaranın sərbəst qalması yönündə problem yaratmayıb.

Bir sözlə, Qara nə baş məşqçi Qurban Qurbanovdan, nə də rəhbərlikdən inciyib. Əksinə, hər şey qaydasındadı. Həm baş məşqçi, həm də “köhlən atlar”ın rəhbərliyi Qaraya yeni komandasında uğurlar arzulayıb.

İLKİN SULTANLI